Buk Song 78:34-40

³⁴Taim God i kilim sampela i dai, ol arapela i tanim bel na i kam bek long em na ol i prea strong long em.

³⁵Nau ol i tingim gen, God em i wasman bilong ol. God Antap Tru em i man bilong helpim ol.

³⁶Tasol ol i giaman na mauswara nating long em.

³⁷Ol i no bihainim tok bilong em, na ol i brukim kontrak ol i bin mekim wantaim em.

³⁸Tasol God i marimari long ol na rausim sin bilong ol, na em i no bagarapim ol. Planti taim em i pasim kros bilong em, na em i no belhat long ol.

³⁹Em i tingting long ol olsem, ol i manmeri tasol, ol i olsem win i kam na i go pinis.

⁴⁰Planti taim ol i bikhet na ol i sakim tok bilong em long ples drai. Na planti taim ol i mekim em i bel hevi.