Buk Song 74:9-22

⁹Olgeta mak yu bin givim mipela, em ol i rausim pinis. Na mipela i no gat profet i stap nau. I no gat wanpela bilong mipela i save wanem taim bai dispela hevi i pinis.

¹⁰God, hamas taim moa bai ol birua i tok bilas long mipela? Bai ol i tok nogut oltaim long nem bilong yu?

¹¹Bilong wanem yu no laik helpim mipela? Bilong wanem yu sindaun nating tasol?

¹²Tasol God, bipo tru yu bin i stap king bilong mipela, na nau tu yu stap king bilong mipela. Na planti taim yu bin helpim mipela na mipela i no bagarap long pait.

¹³Long strong bilong yu tasol yu brukim bikpela solwara, na wara i sanap long hap na long hap. Na yu bagarapim ol manmeri bilong Isip. Ol i olsem ol traipela pis bilong solwara.

¹⁴Na yu brukim ol het bilong bikpela pukpuk, em hetman bilong Isip, na yu givim bodi bilong em long ol manmeri long ples drai i gat wesan, na ol i kaikai.

¹⁵Yu bin mekim ol wara i kamap long graun na ol wara i ran i go. Na yu mekim ol bikpela wara i go drai olgeta.

¹⁶Yu wokim tulait na tudak, na yu putim san na mun i stap antap.

¹⁷Na yu putim pinis mak bilong olgeta graun. Na yu putim taim bilong san na taim bilong ren long olgeta yia.

¹⁸Bikpela, yu no ken lusim tingting. Ol birua bilong yu ol i save tok bilas long yu. Ol i olsem longlong man na ol i ting yu olsem samting nating.

¹⁹Ol manmeri bilong yu i no gat strong. Olsem na nogut yu lusim mipela na ol dispela birua i bagarapim mipela nogut. Ol birua i mekim save long mipela ol manmeri bilong yu. Plis, yu no ken lusim tingting long mipela.

²⁰Long olgeta hap bilong graun bilong mipela ol man i save pait nabaut. Olsem na yu mas tingting gen long dispela kontrak yu bin mekim wantaim mipela.

²¹Yu no ken larim ol man nogut i krungutim ol arapela man na daunim ol tru. Yu mas helpim ol rabisman i sot long ol samting, bai ol i ken litimapim nem bilong yu.

²²God, yu mas kam na tok strong long ol birua. Yu mas tingim ol bikhetman i save tok bilas long yu long olgeta de.