Buk Song 74:6-12

⁶Ol plang ol i bin wokim na bilasim long ol gutpela mak, em ol birua i brukim long ol akis na ol bikpela hama.

⁷Ol i kukim haus bilong yu long paia. Ol i mekim pasin nogut tru na ol i bagarapim tru dispela gutpela ples yu bin makim bilong yu yet i ken i stap long en.

⁸Ol i tingting long daunim tru mipela. Olsem na ol i kukim olgeta haus lotu bilong yu i stap long graun bilong mipela.

⁹Olgeta mak yu bin givim mipela, em ol i rausim pinis. Na mipela i no gat profet i stap nau. I no gat wanpela bilong mipela i save wanem taim bai dispela hevi i pinis.

¹⁰God, hamas taim moa bai ol birua i tok bilas long mipela? Bai ol i tok nogut oltaim long nem bilong yu?

¹¹Bilong wanem yu no laik helpim mipela? Bilong wanem yu sindaun nating tasol?

¹²Tasol God, bipo tru yu bin i stap king bilong mipela, na nau tu yu stap king bilong mipela. Na planti taim yu bin helpim mipela na mipela i no bagarap long pait.