Buk Song 69:22-36

²²Orait taim ol i bung long bikpela kaikai, mi laik bai dispela taim bilong amamas i ken kamap samting bilong bagarapim ol, olsem umben i holim abus na olsem hul ol i ken pundaun long en.

²³Mekim ai bilong ol i tudak, bai ol i no inap lukluk moa. Bagarapim baksait bilong ol, bai ol i no inap sanap strong.

²⁴Yu ken kros moa long ol na mekim save long ol. Na belhat bilong yu i ken kisim ol, na bai ol i lus.

²⁵Ples ol i stap long en, em i ken i stap nating, na yu no ken larim wanpela man i stap long ol haus sel bilong ol.

²⁶Sampela man yu bin bekim sin bilong ol pastaim, ol man nogut i wok yet long mekim nogut long ol. Yu bin brukim skin bilong sampela man na givim pen long ol, na ol man nogut i tok bilas long ol na givim hevi long ol.

²⁷Yu no ken lusim tingting long sin bilong ol man nogut. Na yu no ken larim ol i kam insait long lain manmeri bilong yu.

²⁸Yu mas rausim nem bilong ol long buk bilong laip. Na yu no ken putim nem bilong ol i stap wantaim nem bilong ol stretpela manmeri.

²⁹Tasol mi karim bikpela hevi na pen. God, kisim bek mi na mekim mi i orait gen.

³⁰Bai mi mekim song na litimapim nem bilong God, na bai mi tenkyu long em na tokaut long biknem bilong em.

³¹Na bai Bikpela i laikim tumas dispela pasin mi mekim. Em i no save laikim tumas ol ofa bilong bulmakau.

³²Ol manmeri i karim hevi bai ol i lukim dispela na bai ol i amamas. Na ol manmeri i save lotu long God, ol i ken kisim strong gen.

³³Bikpela i save harim prea bilong ol manmeri i sot long ol samting, na em i no save lusim tingting long ol manmeri bilong en ol i stap long kalabus.

³⁴Skai wantaim graun na solwara na olgeta pis samting i stap long solwara, yupela olgeta i mas litimapim nem bilong God.

³⁵Long wanem, God bai i kisim bek ol manmeri bilong Saion long han bilong ol birua, na bai em i wokim gen ol taun bilong Juda. Em i mekim olsem, na bai ol manmeri bilong God ol i ken i stap gut long ol dispela taun na kisim dispela graun olgeta.

³⁶Ol tumbuna pikinini bilong ol wokman bilong God bai ol i kisim dispela graun, na ol manmeri i laikim tru God, bai ol i stap oltaim long dispela graun.