Buk Song 69:1-8

¹Devit i raitim dispela song. Man i bosim musik i mas tokim ol man long singim song long nek ol i kolim “Naispela plaua.” God, helpim mi. Wara i kam antap pinis inap long nek bilong mi.

²Mi go daun insait long bikpela tais. I no gat strongpela graun bai mi sanap long en. Mi wokabaut long wara i daun moa na tait i laik karamapim mi olgeta.

³God, mi wok long singaut singaut long yu na strong bilong mi i pinis. Na nek bilong mi em i drai, na ai bilong mi i pen, long wanem, mi wet longtaim tumas long yu i helpim mi.

⁴Ol man i birua nating long mi, ol i planti moa. Namba bilong ol gras bilong het bilong mi i no inap long ol. Ol birua i laik mekim pasin nogut long mi, na ol i giaman long as bilong dispela pasin ol i mekim. Ol dispela man i strong tumas na ol i laik kilim mi i dai. Mi no bin stilim wanpela samting bilong ol, tasol ol i sutim planti tok long mi. Olsem na mi givim ol samting bilong mi yet long ol.

⁵God, yu save pinis long mi, mi krankiman tasol. Ol sin bilong mi i no hait long ai bilong yu.

⁶God, Bikpela I Gat Olgeta Strong, yu no ken larim mi i mekim sampela pasin i no stret na bai ol man i save bilip long yu, ol i sem. God bilong mipela Israel, yu no ken larim mi i mekim sampela pasin na bai ol man i tok nogut long ol manmeri i save lotu long yu.

⁷Mi save bihainim yu, olsem na ol man i tok bilas long mi, na ol i mekim mi i sem.

⁸Ol brata bilong mi ol i lukim mi i olsem man bilong narapela lain. Na ol famili bilong mi ol i lukim mi i olsem man bilong longwe ples.