Buk Song 68:15-34

¹⁵Maunten bilong Basan em i traipela maunten tru. Em i gat planti kil moa.

¹⁶Yu maunten i gat planti kil, bilong wanem yu lukim maunten God i bin makim bilong em i ken sindaun long en na yu ting em i olsem samting nating? Bikpela bai i stap oltaim oltaim long dispela maunten.

¹⁷Bikpela i lusim maunten Sainai na i kam i stap long haus bilong em yet. Em i kam wantaim ol soldia bilong en ol i stap long planti tausen strongpela karis bilong pait.

¹⁸God i bin i go antap long maunten i antap moa, na em i kisim bikpela lain kalabus i go wantaim em. Em i bin kisim ol presen bilong ol bikhetman i bin pait long em. God, Bikpela bai i stap long dispela maunten.

¹⁹Yumi litimapim nem bilong Bikpela. Olgeta de em i save karim ol hevi bilong yumi. God wanpela tasol i save kisim bek yumi.

²⁰God bilong yumi yet i save helpim yumi na yumi stap gut. God, Bikpela bilong yumi, em i save helpim yumi na yumi no i dai.

²¹Tru tumas, God bai i bagarapim tru ol birua bilong en, em dispela ol man i save bihainim pasin nogut oltaim.

²²Bikpela i tok olsem, “Bai mi kisim ol birua bilong yupela long Basan na bringim ol i kam bek. Maski ol i stap daunbilo tru long as bilong solwara, bai mi bringim ol i kam bek.

²³Bai yupela i mekim save long ol birua bilong yupela, na yupela i ken belgut. Na ol dok bilong yupela i ken dringim blut bilong ol birua inap long laik bilong ol.”

²⁴God na king bilong mi, olgeta manmeri i lukim yu i winim pinis dispela pait na yu amamas i kam. Olgeta i lukim yu i go insait long haus bilong yu.

²⁵Ol man i singim song ol i go pas, na ol man bilong mekim musik ol i kam bihain, na ol yangpela meri i save paitim ol liklik kundu, ol i wokabaut namel.

²⁶Ol i singim song olsem, “Yumi manmeri bilong God, yumi bung pinis, orait yumi mas litimapim nem bilong God. Yumi ol lain bilong Israel, yumi litimapim nem bilong Bikpela.”

²⁷Ol liklik lain bilong Benjamin ol i go pas. Na ol hetman bilong Juda wantaim ol manmeri bilong Juda ol i bihainim ol Benjamin. Na ol hetman bilong Sebulun na Naptali ol i kam bihain.

²⁸God, yu mas soim strong bilong yu long mipela. Bipo yu bin helpim mipela long dispela strong tasol.

²⁹Ol king i bringim presen na i givim long yu long haus bilong yu long Jerusalem.

³⁰Yu ken krosim dispela wel abus i stap long tais. Yu ken krosim ol dispela lain manmeri i save mekim olsem ol bulmakau man na olsem ol pikinini bulmakau. Krosim ol inap ol i brukim skru long yu na givim silva bilong ol long yu. Rausim ol dispela manmeri i laikim tumas long kirapim pait, na ol i ken ranawe nabaut.

³¹King bilong Isip bai i salim ol ofisa bilong en i go long Jerusalem bilong harim tok bilong yu. Na bai ol Sudan i litimapim han na i prea long yu.

³²Yupela ol arapela lain manmeri, yupela i mas singim ol song long God bilong litimapim nem bilong em.

³³Em i save wokabaut long skai, na dispela skai i stap bipo yet. Harim. God i singaut strong moa.

³⁴Yupela olgeta manmeri i mas tokaut long bikpela strong bilong God. Em i king bilong ol Israel. Yumi inap lukim bikpela strong bilong en long skai.