Buk Song 66:6-11

⁶Em i mekim solwara i kamap ples drai, na ol tumbuna bilong mipela i bin wokabaut tasol na brukim wara. Ol i kam pinis long sua na ol i amamas long God.

⁷Em i gat bikpela strong, na em i stap king oltaim oltaim. Na em i save lukim gut olgeta samting ol lain manmeri i mekim. Olsem na nogut sampela lain i bikhet long God.

⁸Yupela olgeta lain, yupela i mas litimapim nem bilong God bilong yumi. Yupela litimapim nem bilong God na bai ol manmeri i harim.

⁹Em i bin lukautim yumi na yumi stap laip, na em i no larim yumi i pundaun long sin.

¹⁰God, yu traim mipela pinis, olsem ol man i save kukim silva bilong rausim pipia i stap long en. Ol i kukim long paia na silva i kamap klin tru.

¹¹Yu bin holimpas mipela long umben, na yu putim bikpela hevi long mipela.