Buk Song 64:4-10

⁴Ol i hait i stap na sutim ol spia long ol gutpela man. Ol i no save pret, olsem na ol i sut kwiktaim.

⁵Ol i strongim ol yet long mekim dispela pasin nogut. Ol i toktok long ol hap ples ol i laik putim umben bilong holimpas ol arapela man. Na ol i tingting olsem, “I no gat wanpela man bai i lukim mipela.”

⁶Ol i pasim tok long mekim sampela pasin nogut, na ol i tok, “Mipela i tingting pinis long rot bilong mekim wanpela pasin nogut. Na i no gat wanpela man inap painimaut dispela samting mipela i laik mekim.” Yumi no inap save long tingting na bel bilong ol man. Em i hait olgeta.

⁷Tasol God bai i sutim ol long spia bilong en, na wantu bikpela sua bai i kamap.

⁸Ol i bin tok long bagarapim narapela man, olsem na bai God i bagarapim ol. Ol man i lukim ol bai ol i lap nogut long ol na tromoi het.

⁹Bai olgeta manmeri i pret long God. Na ol bai i toktok long dispela samting God i mekim, na tingting oltaim long dispela.

¹⁰Olgeta stretpela manmeri bai ol i amamas long Bikpela, na bai ol i go long em na hait long samting nogut. Na bai olgeta stretpela manmeri ol i litimapim nem bilong Bikpela.