1Devit i raitim dispela song, em kain song ol i kolim Miktam. Devit i raitim dispela song long taim ol Filistia i bin holimpas em long taun Get. Man i bosim musik i mas tokim ol man long singim song long nek ol i kolim, “Pisin i stap long ol longwe diwai.” God, yu mas marimari long mi. Ol man i save ranim mi na pait long mi. Oltaim ol birua i mekim nogut long mi.
2Long moning i go inap long apinun tru, ol birua i wok long pait long mi. Planti man i birua long mi.
3God Antap Tru, taim mi pret long wanpela samting, mi bilip strong long yu.
4Mi save bilip long God na mi tingting long tok tru bilong em. Olsem na mi save litimapim nem bilong en. Mi save bilip long God, na mi no ken pret long wanpela samting. Bai ol man inap mekim wanem samting long mi? Nogat.
5Olgeta samting mi laik mekim, ol birua i traim long bagarapim. Oltaim ol i tingting long painim rot bilong bagarapim mi.
6Ol i save bung wantaim na hait i stap. Ol i was gut long wokabaut bilong mi, na ol i laik kilim mi i dai.
Buk Song 56
Buk Song 56:1-6