Buk Song 55:7-19

⁷Bai mi flai i go longwe tru na bai mi stap olgeta long hap i no gat man.

⁸Bai mi flai hariap na painim wanpela ples hait, na bai mi hait long strongpela win na ren.”

⁹Mi lukim ol man i pait nabaut insait long taun. Olsem na Bikpela, yu ken paulim toktok bilong ol na pinisim ol tru.

¹⁰Long san na long nait ol i save wokabaut antap long banis ston bilong taun. Na ol manmeri bilong taun i save mekim planti rong na trabel.

¹¹Long olgeta hap bilong taun ol man i save bagarapim ol arapela man na ol samting nabaut. Long arere bilong rot na long ples bung ol man i save daunim ol arapela man, na giamanim ol bilong pulim ol samting bilong ol.

¹²Sapos wanpela birua i tok nogut long mi, maski, mi inap karim hevi bilong tok bilong en.

¹³Tasol nogat. Em yu tasol. Yu nambawan pren bilong mi, na yu poroman tru bilong mi. Yu yet i mekim dispela pasin.

¹⁴Bipo mitupela i save wokabaut wantaim na toktok gut wantaim, na i go long haus bilong God wantaim ol arapela man.

¹⁵Ol birua bilong mi, pasin nogut i pulap tru long bel bilong ol na long haus bilong ol. Orait mi laik bai ol i dai kwiktaim. Taim ol i stap laip yet, na ol i mas i go long ples bilong ol man i dai pinis.

¹⁶Tasol mi prea long God i helpim mi. Na bai em yet i kisim bek mi.

¹⁷Long moningtaim na long biksan na long nait tu mi save krai long em long ol hevi i bagarapim mi. Na bai em i harim prea bilong mi.

¹⁸Planti man i save pait long mi. Tasol mi no kisim bagarap, long wanem, God i lukautim mi na bringim mi i kam bek gen.

¹⁹Bipo tru God i stap king, na nau tu em i stap king. Bai em yet i harim prea bilong mi, na bai em i winim ol birua long pait. Ol i no save pret long em, olsem na ol i no inap mekim wanpela samting bilong helpim ol yet.