Buk Song 51:12-17

¹²Bipo mi amamas long yu i kisim bek mi, na nau mi laik bai yu givim mi dispela amamas gen. Yu mas kirapim laik bilong mi long bihainim tok bilong yu, na yu ken strongim mi long mekim olsem.

¹³Na bai mi lainim ol manmeri i save mekim sin, bai ol i ken save long pasin bilong yu, na bai ol dispela manmeri i kam bek long yu.

¹⁴God, yu God bilong kisim bek mi, yu ken marimari long mi na yu no ken kilim mi i dai. Olsem na bai mi mekim planti song long yu i bin mekim stretpela pasin.

¹⁵Bikpela, yu ken helpim mi long tokaut stret, na long litimapim nem bilong yu.

¹⁶Yu no laik bai mi bringim abus bilong mekim ofa long yu. Sapos mi kilim abus bilong ofa na paia i kukim olgeta, maski, yu no amamas long dispela.

¹⁷Orait God, mi daunim mi yet na mi stap aninit long yu. Dispela em i ofa bilong mi. Mi save, yu no givim baksait long man i pilim hevi long sin na i daunim em yet.