Buk Song 44:8-14

⁸God, oltaim mipela i bin litimapim nem bilong yu. Na bai mipela i tok tenkyu long yu oltaim oltaim.

⁹Tasol nau olsem wanem? Yu givim baksait pinis long mipela na yu rabisim mipela, na yu no moa i go wantaim ol ami bilong mipela long pait.

¹⁰Yu mekim olsem na mipela i ranawe long ol birua, na ol i kisim pinis ol samting bilong mipela.

¹¹Yu bin larim mipela i kamap olsem ol sipsip ol i laik kilim i dai. Yu rausim mipela long graun bilong mipela, na mipela i go i stap nabaut namel long ol arapela lain pipel.

¹²Yu larim ol manmeri bilong yu i kamap wokboi nating bilong ol arapela lain, na ol dispela lain i baim yu long liklik pe tru. Yu no kisim bikpela mani long ol.

¹³Yu mekim olsem long mipela, na ol lain i stap klostu long mipela i save tok bilas long mipela. Ol manmeri nabaut i save lap nogut na tok sem long mipela.

¹⁴Yu kirapim ol lain pipel na ol i tok sem long nem bilong mipela. Ol i lap nogut tru long samting i kamap long mipela.