Buk Song 3:2-8

²Ol i tokim mi olsem, “God bai i no inap helpim yu.”

³Tasol tok bilong ol i no tru. God, yu olsem hap plang bilong pait i haitim mi. Yu tasol yu mekim mi i win. Yu tasol yu pinisim bel hevi bilong mi na mekim mi i sanap strong.

⁴Mi save singaut long God i helpim mi. Em i stap long maunten bilong em yet na em i harim singaut bilong mi.

⁵Mi save slip long bet na mi slip i dai. Na bihain mi save kirap gen na mi stap gut, long wanem, God i save lukautim mi.

⁶10,000 birua i banisim mi long olgeta hap, tasol mi no ken pret long ol.

⁷Bikpela, yu kam. Yu God bilong mi, yu kam helpim mi. Yu save paitim nabaut ol birua bilong mi. Yu save brukim tit bilong ol man nogut.

⁸Bikpela, yu wanpela tasol yu save kisim bek mipela na mipela i no save bagarap. Yu ken mekim gut long ol manmeri bilong yu.