Buk Song 31:3-24

³Tru tumas, yu olsem ples hait bilong mi na yu lukautim mi. Yu go pas long mi na bringim mi i go long gutpela rot, olsem yu bin tok bipo long mekim.

⁴Ol birua i bin putim umben bilong holimpas mi. Yu mas lukautim mi bai mi no kisim bagarap long en. Long wanem, yu tasol yu ples hait bilong mi.

⁵Mi putim spirit bilong mi long han bilong yu. Bikpela, yu God bilong mekim pasin tru tasol, yu kisim bek mi pinis.

⁶Yu no save laikim tru ol man i save lotu long ol giaman god. Tasol mi bilip long yu.

⁷Yu sori long mi oltaim, olsem na mi amamas long yu. Yu lukim dispela hevi bilong mi, na yu save long olgeta trabel i kamap long mi.

⁸Yu no bin larim ol birua i kalabusim mi. Yu bin helpim mi na mi stap gut.

⁹Bikpela, yu mas marimari long mi. Mi gat bikpela hevi. Mi krai planti na ai bilong mi i solap pinis. Ol bun bilong mi i slek olgeta.

¹⁰Bel hevi bilong mi yet i sotim laip bilong mi. Mi krai tumas, olsem na mi no inap i stap longpela taim. Mi gat bikpela hevi moa, olsem na strong bilong mi i pinis, na olgeta bun bilong mi i wok long bagarap.

¹¹Ol birua i save tok bilas long mi. Ol wantok i tok nogut long mi, na ol pren bilong mi i pret nogut long mi. Mi wokabaut long rot, na ol man i lukim mi ol i ranawe.

¹²Olgeta man i lusim tingting long mi olsem ol i save lusim tingting long man i dai pinis. Mi olsem sospen graun i bruk na ol i tromoi pinis.

¹³Mi harim planti birua i tok baksait long mi. Ol i laik pretim mi moa yet. Na ol i bung wantaim na pasim tok bilong mekim nogut long mi. Ol i tok long kilim mi i dai.

¹⁴Tasol maski. Bikpela, mi save bilip long yu. Mi tok olsem, yu God bilong mi.

¹⁵Oltaim mi save stap long han bilong yu. Yu mas kisim bek mi long han bilong ol birua na bilong ol man i ranim mi. Nogut ol i bagarapim mi.

¹⁶Mi wokman bilong yu, na yu ken marimari long mi. Yu save laikim mi tumas, olsem na yu kisim bek mi.

¹⁷Bikpela, mi singaut long yu bai yu helpim mi. Yu no ken larim ol birua i winim mi. Tasol ol man nogut i ken bagarap. Ol i ken i dai na go long ples bilong ol man i dai pinis, na maus bilong ol i ken pas.

¹⁸Ol dispela man i save bikhet na tok bilas, na tok nogut long ol stretpela man. Ol i tok giaman tasol. Yu mas bagarapim ol na maus bilong ol bai i pas tru.

¹⁹Yu save mekim gutpela wok tru bilong helpim ol man i stap aninit long yu. Yu save lukautim gut ol man i bilip long yu. Yu save helpim ol moa yet long ai bilong olgeta manmeri.

²⁰Yu save haitim ol dispela man klostu long yu, na ol man i pasim tok bilong kilim ol, ol i no inap. Yu save haitim gut ol dispela man i stap aninit long yu, na tok nogut bilong ol birua i no inap daunim ol.

²¹Litimapim nem bilong Bikpela. Em i givim bel bilong em moa yet long mi. Taim ol birua i raunim mi na i laik bagarapim mi, em i helpim mi long strong bilong en na mi stap gut.

²²Bikpela, bipo mi pret tru na mi ting yu rausim mi pinis na mi no moa i stap klostu long yu. Tasol yu harim krai bilong mi na yu helpim mi taim mi singaut long yu.

²³Ol manmeri bilong God, yupela i mas laikim em tru. Em i save lukautim gut ol manmeri i bihainim em. Tasol em i save bekim pe nogut long ol manmeri i save bikhet.

²⁴Yupela olgeta manmeri i bilip long Bikpela, yupela sanap strong, na bel bilong yupela i ken kisim strong oltaim.