Buk Song 27:3-14

³Maski sapos bikpela lain ami i kam raunim mi, bai mi no ken pret. Maski sapos ol birua i kam pait long mi, mi bilip long God na mi no ken surik.

⁴Mi bin askim God long wanpela samting tasol, na mi laikim tumas bai em i mekim olsem. Mi askim em bai mi ken i stap long haus bilong em inap olgeta de mi gat laip. Mi laik amamas long em i gutpela tumas long mi. Na mi laik askim em long soim mi gutpela rot.

⁵Taim samting nogut i kamap long mi bai em i haitim mi long haus bilong em. Bai em i pasim dua na haitim mi gutpela tru. Bai em i putim mi antap long wanpela bikpela ston tru na mi stap gut.

⁶Olsem na bai mi winim ol birua i raunim mi, na bai mi daunim ol. Bai mi singaut amamas moa yet na mekim ofa long haus bilong God. Bai mi mekim song bilong litimapim nem bilong em.

⁷Bikpela, taim mi singaut long yu, yu ken marimari long mi na harim beten bilong mi.

⁸Yu tokim mi olsem, “Yu kam long mi.” Orait Bikpela, bai mi go long yu.

⁹Yu no ken haitim yu yet long mi. God, yu helpim bilong mi. Mi wokman bilong yu, na yu no ken belhat long mi na rausim mi. Yu bin helpim mi planti taim. Yu no ken lusim mi. Yu no ken ranawe long mi.

¹⁰Maski papa na mama i givim baksait long mi, Bikpela bai i lukautim mi.

¹¹Bikpela, yu ken lainim mi long samting yu laik bai mi mekim. Mi gat planti birua i stap, olsem na yu ken bringim mi long gutpela rot.

¹²Yu no ken lusim mi bai ol birua i kisim mi. Ol i save mekim tok giaman na pretim mi.

¹³Tru tumas, bihain bai mi lukim God i mekim gut long ol manmeri bilong em.

¹⁴Yu mas bilip na wetim Bikpela i kam helpim yu. Sanap strong. Yu no ken bel hevi. Yu mas bilip na wetim Bikpela i helpim yu.