Buk Song 25:5-19

⁵Lainim mi long bihainim tok tru bilong yu, long wanem, yu save kisim bek mi. Long olgeta de mi save wet long yu i helpim mi.

⁶Bikpela, yu mas tingting long marimari na sori bilong yu. Yu save mekim dispela pasin long bipo yet i kam inap nau.

⁷God, yu no ken tingting moa long sin na pasin nogut mi mekim taim mi yangpela yet. Yu God bilong sori na yu gutpela oltaim. Yu ken tingting long mi na marimari long mi.

⁸Bikpela i gutpela na i stretpela olgeta. Em i save skulim ol man i save mekim sin long pasin em i laik bai ol i mas bihainim.

⁹Em i save stiaim ol man i stap aninit long em, na ol i bihainim stretpela pasin. Em i save skulim ol tu long rot bilong em.

¹⁰God i save givim bel bilong em long olgeta manmeri i bihainim kontrak na lo bilong em. Na em i no save senisim tingting bilong em.

¹¹God, bihainim promis bilong yu, na lusim ol planti sin mi bin mekim. Yu ken lusim olgeta rong bilong mi na bai mi litimapim nem bilong yu.

¹²Olgeta man i bihainim tok bilong Bikpela, bai God i soim gutpela rot long ol, na ol i mas wokabaut long en.

¹³Ol kain man olsem bai i stap gutpela tru, na ol pikinini bilong ol bai i stap gut long dispela graun.

¹⁴God em i pren tru bilong ol manmeri i save stap aninit long em. Na em i save skulim ol long kontrak em i bin mekim wantaim ol.

¹⁵Olgeta taim mi save wetim God i helpim mi. Em i save kisim bek mi long ol samting i laik bagarapim mi.

¹⁶God, kam long mi gen na marimari long mi, long wanem, mi stap wanpis na strong bilong mi i pinis.

¹⁷Pinisim olgeta bel hevi bilong mi, na bel bilong mi i ken i stap isi. Helpim mi, na ol hevi bai i no inap daunim mi.

¹⁸Tingting long olgeta bel pen na hevi i stap long mi, na lusim olgeta sin bilong mi.

¹⁹Yu lukim ol birua bilong mi ol i planti tumas. Ol i no laikim mi liklik. Nogat tru.