Buk Song 22:13-27

¹³Ol i redi long bagarapim mi, olsem laion i singaut nogut na i opim maus bilong kaikai abus.

¹⁴Strong bilong mi i pinis olgeta, olsem wara ol i kapsaitim nating na i pinis olgeta. Olgeta skru bilong bun i lus. Bel bilong mi i malumalum tru, olsem gris i kamap olsem wara.

¹⁵Nek bilong mi em i drai pinis, na tang bilong mi i pas long maus. Yu yet yu lusim mi na mi laik i dai olgeta.

¹⁶Dispela ol man nogut i raunim mi long olgeta hap olsem ol dok i banisim wel abus. Ol i sutim han na lek bilong mi long tit bilong ol.

¹⁷Olgeta bun bilong mi i kamap ples klia. Na dispela ol man i lukim mi, na ol i amamas long mi bagarap.

¹⁸Ol i tilim klos bilong mi na ol i kisim, na ol i pilai satu bilong makim wanem man i ken kisim saket bilong mi.

¹⁹Bikpela, yu no ken i stap longwe long mi. Yu save helpim mi oltaim. Na yu ken kam hariap na helpim mi nau.

²⁰Yu mas kisim bek mi bai ol i no inap kilim mi i dai. Helpim mi, na dispela ol man i olsem ol dok bai ol i no ken kilim mi i dai. Bai mi stap laip.

²¹Ol i laik pinisim mi olsem laion i kaikai wel abus. Ol i stap olsem ol wel bulmakau i laik sutim mi long kom bilong ol. Yu mas kisim bek mi long han bilong ol.

²²Yu mekim olsem na bai mi autim tok long ol brata bilong mi long strongpela wok yu bin mekim. Taim ol i bung bilong lotu bai mi go namel long ol na litimapim nem bilong yu.

²³Bai mi tok olsem, “Yupela ol lain bilong God, litimapim nem bilong em. Yupela lain bilong Jekop, litimapim nem bilong Bikpela. Yes, yupela lain bilong Israel, yupela lotu long em.

²⁴Em i no save givim baksait long ol rabisman. Em i no save ting hevi na pen bilong ol em i samting nating. Em i no save stap longwe long ol. Nogat. Em i save harim beten bilong ol.”

²⁵Long bikpela bung bilong lotu bai mi litimapim nem bilong yu wanpela tasol. Bai mi autim tok long olgeta samting yu bin mekim. Ofa bipo mi promis long mekim, em bai mi mekim long ai bilong ol manmeri i save pret long yu.

²⁶Ol rabisman bai ol i kaikai na i pulap tru. Na ol man i go long God, bai ol i litimapim nem bilong em. God i ken mekim ol i stap gut oltaim.

²⁷Olgeta manmeri bilong graun bai ol i tingting long God, na bai ol i kam bek long em. Olgeta lain manmeri bai ol i lotu long em.