Buk Song 17:5-14

⁵Oltaim mi save wokabaut long rot bilong yu, na lek bilong mi i no abrus liklik.

⁶God, yu save bekim prea bilong mi, olsem na mi save beten long yu. Yu ken putim yau na harim prea bilong mi.

⁷God, helpim bilong mipela, soim bikpela marimari bilong yu long mipela. Mipela i stap klostu long yu na hait long ol birua.

⁸Lukautim mi olsem yu save lukautim ai bilong yu yet. Haitim mi gut olsem kakaruk mama i save karamapim ol pikinini long wing bilong en.

⁹Olsem bai ol man nogut i no inap bagarapim mi. Ol i birua nogut tru long mi, na ol i wok long banisim mi.

¹⁰Ol i no save marimari liklik long ol arapela man. Ol i save bikmaus na litimapim nem bilong ol yet.

¹¹Ol i bihainim lek bilong mi, na nau ol i banisim mi. Ol i makim mi pinis na ol i wet long daunim mi.

¹²Ol i olsem laion i laik kilim abus, na olsem yangpela laion i hait na i was i stap.

¹³Bikpela, yu kam pait long ol birua bilong mi na daunim ol. Kisim bainat bilong yu na pait long ol na kisim bek mi long han bilong ol man bilong mekim sin.

¹⁴Tru, God, yu mas helpim mi long strong bilong yu, na ol man i no inap pinisim mi. Kisim bek mi long han bilong ol dispela man i save bungim ol samting bilong graun tasol. Yu redi pinis long bekim pasin nogut bilong ol. Orait nau yu ken mekim save long ol. Mekim save long ol pikinini bilong ol na long ol lain tumbuna i kamap bihain.