Buk Song 148:6-13

⁶Em i tok na ol i stap oltaim long hap bilong ol, na ol i no inap sakim tok bilong en.

⁷Yupela ol traipela pis na ol samting i stap long as bilong solwara i daun moa,

⁸na lait i kamap long klaut na ren ais na ol klaut nabaut na strongpela win i save bihainim tok bilong Bikpela, yupela litimapim nem bilong en.

⁹Yupela ol bikpela maunten na ol liklik maunten, na ol diwai i save karim kaikai na ol diwai bilong bus,

¹⁰na olgeta abus ol man i save bosim na ol wel abus, na ol pukpuk na ol pisin, yupela litimapim nem bilong Bikpela!

¹¹Yupela ol king na olgeta lain manmeri, na ol gavman na olgeta arapela hetman,

¹²na ol yangpela man na ol yangpela meri, na ol lapun na ol pikinini, yupela olgeta litimapim nem bilong Bikpela!

¹³Tru tumas, olgeta i mas litimapim nem bilong Bikpela. Biknem bilong em wanpela i winim tru biknem bilong olgeta manmeri. Biknem bilong en i antap tru, i winim heven na graun.