Buk Song 141:2-8

²Mi laik yu kisim prea bilong mi olsem smok i gat gutpela smel i go long yu, na olsem ofa mi mekim long nait.

³Bikpela, yu mas was gut long maus bilong mi, na bosim gut toktok bilong mi.

⁴Yu no ken larim bel bilong mi i kirap long mekim pasin nogut. Na nogut yu larim mi i bung wantaim ol man nogut na mekim sampela rong. Yu no ken larim mi i sindaun wantaim ol long pati bilong ol.

⁵Gutpela man i ken sori long mi na mekim save long mi na krosim mi. Tasol mi no ken pren wantaim ol man nogut. Long wanem, oltaim mi save beten long God long em i ken bekim pasin nogut bilong ol.

⁶Taim sampela man i kisim ol dispela man nogut na bagarapim ol, orait ol bai i save olsem, tok bilong Bikpela i tru olgeta.

⁷Na bai ol i tromoi bun bilong ol dispela man i go long ples matmat, olsem man i brukim hap diwai i go liklik liklik na tromoi nabaut.

⁸Tasol God, Bikpela, mi save bilip long yu. Lukautim mi gut, yu no ken larim mi i dai.