Buk Song 136:7-22

⁷Em i bin wokim san na mun. Oltaim oltaim em i save laikim yumi moa yet.

⁸Em i mekim san i bosim tulait. Oltaim oltaim em i save laikim yumi moa yet.

⁹Em i mekim mun na ol sta i bosim nait. Oltaim oltaim em i save laikim yumi moa yet.

¹⁰Em i bin kilim ol nambawan pikinini bilong ol Isip. Oltaim oltaim em i save laikim yumi moa yet.

¹¹Em i bringim ol Israel i kam na ol i lusim Isip. Oltaim oltaim em i save laikim yumi moa yet.

¹²Long bikpela strong bilong em yet, em i bringim ol i kam. Oltaim oltaim em i save laikim yumi moa yet.

¹³Em i mekim, na solwara Retsi i bruk tuhap. Oltaim oltaim em i save laikim yumi moa yet.

¹⁴Em i go pas na bringim ol manmeri bilong en i kam na ol i brukim solwara. Oltaim oltaim em i save laikim yumi moa yet.

¹⁵Em i mekim king bilong Isip na ol soldia bilong en i dring wara na i dai. Oltaim oltaim em i save laikim yumi moa yet.

¹⁶Em i go paslain long ol manmeri bilong en long ples drai. Oltaim oltaim em i save laikim yumi moa yet.

¹⁷Em i bin kilim i dai ol strongpela king. Oltaim oltaim em i save laikim yumi moa yet.

¹⁸Na em i kilim ol king i gat biknem. Oltaim oltaim em i save laikim yumi moa yet.

¹⁹Em i kilim Sihon, king bilong ol Amor. Oltaim oltaim em i save laikim yumi moa yet.

²⁰Na em i kilim Ok, king bilong Basan. Oltaim oltaim em i save laikim yumi moa yet.

²¹Na em i givim graun bilong ol dispela king long ol manmeri bilong en. Oltaim oltaim em i save laikim yumi moa yet.

²²Em i givim dispela graun long Israel, wokman bilong en. Oltaim oltaim em i save laikim yumi moa yet.