Buk Song 135:7-18

⁷Em i save mekim ol klaut bilong ren i kamap long olgeta hap graun, na em i save mekim lait bilong klaut i kamap wantaim ren, na em i save kirapim win na salim i go nabaut.

⁸Long Isip em i bin kilim i dai ol nambawan pikinini bilong ol Isip na bilong ol abus bilong ol.

⁹Na long Isip em i wokim olkain mirakel bilong mekim save long king wantaim ol ofisa bilong en.

¹⁰Bikpela i bagarapim planti kantri na kilim i dai ol strongpela king.

¹¹Em i kilim Sihon, king bilong ol Amor, na Ok, king bilong Basan, na olgeta king bilong graun Kenan.

¹²Na em i givim graun bilong ol dispela king long ol manmeri bilong en, ol Israel.

¹³Bikpela, oltaim ol manmeri bai i save yu yet yu God tru. Na olgeta lain i kamap bihain, ol tu bai i tingim yu.

¹⁴Na Bikpela bai i marimari long ol manmeri bilong en na sori long ol dispela wokman bilong en.

¹⁵Ol arapela lain i bin wokim ol giaman god bilong ol long silva na gol. Han bilong ol man yet i bin wokim ol giaman god.

¹⁶Ol dispela giaman god i gat maus, tasol ol i no inap toktok. Na ol i gat ai, tasol ol i no inap lukim samting.

¹⁷Na ol i gat yau, tasol ol i no inap harim samting, na ol i no inap pulim win.

¹⁸Mi laik bai ol man i bin wokim ol giaman god na i save bilip long ol dispela samting, ol i ken kamap wankain olsem ol dispela giaman god.