Buk Song 119:143-164

¹⁴³Planti hevi i kamap long mi, tasol mi amamas long lo bilong yu.

¹⁴⁴Tok bilong yu i stretpela oltaim oltaim. Yu helpim mi bai mi kisim save long dispela tok na mi ken i stap laip.

¹⁴⁵Bikpela, mi prea strong tru long yu. Harim beten bilong mi, na bai mi bihainim olgeta tok bilong yu.

¹⁴⁶Nau mi singaut long yu. Kisim bek mi, na bai mi ken bihainim ol lo bilong yu.

¹⁴⁷Tulait i no bruk yet na mi beten long yu long helpim mi. Mi save bilip strong long promis bilong yu.

¹⁴⁸Long nait mi no save slip. Mi tingting oltaim long tok bilong yu tasol.

¹⁴⁹Bikpela, yu save laikim mi oltaim na yu harim prea bilong mi. Yu gutpela tumas, olsem na yu mas lukautim mi bai mi stap laip.

¹⁵⁰Ol man i gat tingting nogut na i laik bagarapim mi, ol i kam klostu. Ol i no save bihainim lo bilong yu.

¹⁵¹Tasol Bikpela, yu stap klostu long mi, na olgeta lo bilong yu i tru tasol.

¹⁵²Bipo tru mi save long tok bilong yu. Yu mekim dispela tok i stap oltaim oltaim.

¹⁵³Yu lukim mi i gat bikpela hevi, olsem na yu mas pinisim dispela hevi. Mi no save lusim tingting long lo bilong yu.

¹⁵⁴Helpim mi na kisim bek mi na givim mi laip, olsem yu bin promis long mekim.

¹⁵⁵Ol man nogut i no save bihainim stretpela lo bilong yu, olsem na bai yu no kisim bek ol.

¹⁵⁶Bikpela, marimari bilong yu i bikpela moa. Yu pasim tok pinis long kisim bek mi, orait nau mi laik yu mekim olsem.

¹⁵⁷Planti man i wok long mekim nogut long mi na birua long mi, tasol mi no lusim tok tru bilong yu.

¹⁵⁸Taim mi lukim ol man i sakim bilip, mi save kros long ol, long wanem, ol i no bihainim tok bilong yu.

¹⁵⁹Yu lukim mi, mi laikim tumas tok bilong yu. Yu save laikim mi tumas, olsem na yu mas kisim bek mi.

¹⁶⁰As bilong lo bilong yu em i tok tru tasol. Na olgeta stretpela lo bilong yu i save stap oltaim oltaim.

¹⁶¹Ol hetman i save mekim nogut long mi, na i no gat as bilong dispela pasin bilong ol. Tasol mi save tingting long tok bilong yu.

¹⁶²Mi amamas moa yet long ol promis bilong yu, olsem wanpela man i kisim planti gol samting.

¹⁶³Mi no laik tru long pasin giaman na bel bilong mi i nogut long en.

¹⁶⁴7-pela taim long olgeta de mi save tenkyu long yu long ol stretpela tok yu mekim long kot.