Bugagia Bidibo Kolesagade Po Asęai Buku 8:1-14

¹Wiegi yai doloba pai homu kolesaga te we me deli dolugulama, te da i wabo tiwai ebao.

²Aga te bulu du elalubo pesage te sunumi dabe pąde, me te sunumi tulu mage si dabede dolalubo dao.

³Tama aga te genuai taun hanu bagulali obo te sunumi dabe pąde dolalu, tama te tiwai i wabo sę iduaibao,

⁴“Eno dage tigidali we bidi bomonama i obao.

⁵Dage kolesaga konesiąwani bidi, te kolesaga koneiąo. Dage te homu kolesaga siąo.

⁶Te eno dagebolo mawainu ebo te wiegi yai doloba pai poba olo bugagia muiąo.

⁷Te sesemane sogo eno te mu po naga weyu, tama eno te tobage dwai po dabe wabo te hagela homu ebo dao.

⁸Eno po tigidali te doloba pai naga dao. Eno te gagea pai tibo po deli me wagobeo.

⁹Te pogo page te homu kolesaga koneani bidigo te mu konea pelama, tama augwa koneyu, te po te dolo po mu wali homu ebo dao.

¹⁰Te eno dagebolo te dage wiegi yai koneabo kolesaga ola momainu eyu, dagego te usu da po wao, magi baso meni, te eno mobo mabo pogo te wiegi yai silva me gol aiyaba elalubo dao.”

¹¹“Ena digi ena te wiegi yai me doloba pai homu elama, tama eno te gasagi yai sawi yai tobage masigi dabe, me te dagego wei mu ebo nai tigidali me te aiyaba elaluai dao.

¹²Tama eno te bugagia bilibo kolesaga koneani. Eno te koneani kolesaga elalu, tama eno te haniani nai dagalabo te usu yaibao.

¹³Te Genuai Bidide wi eyu, aga dologode bidibo bidi da, agai te dwai kolesaga dabe te wei mu me egobeo. Eno te hagoma ebo kolesaga me, te bidi aga digi aga nogi ugwaba sabo kolesaga me, tama te tobage dwai sę ebo kolesaga me, te tibo po wabo kolesaga me, te eno wei mu me ebeo. Menio. Eno te tobage kolesaga ebo hagela mu ebo dao.

¹⁴Eno te wiegi yai homu kolesaga te we bidi dabeba mayu, tama eno augwali te tau siyu, te wiegi yai sę ebaso, usu igi dao. Ena digi eno te wiegi yai homu elalu, tama eno genuai bomo elalubo dao.