Bugagia Bidibo Kolesagade Po Asęai Buku 6:16-26

¹⁶Genuai Bidigo te bidi dabego te e 7 kolesaga dabe ebo da te godolo homu mu meni isąwanio, agai tede sębę ebo dao. Augwali e dao.

¹⁷Te hagoma ebo kolesagago te gasa bidi dabe tonobo te olo bage tiwai ebo kolesaga. Me te tibo po wabo kolesaga. Me te gasa bidi dabe olo dali ela mubo kolesaga ebo.

¹⁸Te dwai sę yabo homu ebo kolesaga. Tama me te dwai sę asesa polo ebo kolesaga.

¹⁹Te tibo po tų yainu ebo kolesaga. Me, te bidi dabego te augwa ama hasi te dwai haliga ilibo kolesaga ebo dao.

²⁰Ogwao, nago te naga ayago po wali pao, tama nago idago po me sela sągio.

²¹Nago te augwaligo po te naga homude munama, tama sesemane bugagia wali pobaso da, tama teda te nago tobolude me magede te wiegi yai au tiwai te pedelabo dao.

²²Te nage bilibo sogo, te pogo te nageba sunumi ola mawaibao. Tama nage te pibo sogo, teda te pogo te nage tonaluaibao. Tama nage hodalubo sogo da, teda te pogo te nageba wiegi yai homu kolesaga mawaibao.

²³Magi baso meni. Te aya idago po te lam ula me deli te wiegi yai eyu, te nageba sunumi ola mabo tiwai ebao. Tama augwaligo te nage dodolobo sogo, te nage bidibo ula elalubo tau sabo wiegi yai kolesaga wali pomainu yaibao.

²⁴Te augwaligo te pogo nage tau siyu, tama te dwai sę ebo we dabego te nage tibo po me ola masiąbo po me wasiąyu, tama nago te gasa bidigo wego pusai po wabo me odogobeo.

²⁵Nago te wego te sawi yai tigi subaso, te nago pesą ebo homu me igio. Tama agai te nage kekainu te nageba tonono ebaso da, teda nage te agaba me pigio.

²⁶Te bidi te penani we dali bidibaso da, te dwasianu monego naga abelebo dao. Tiali goli, bidigo te gasa bidigo we dali pagela pibaso da, te genuai sęgę mu ebao. Te aga bidabo ula tede tagalainu te ebao.