Bugagia Bidibo Kolesagade Po Asęai Buku 30:3-21

³Eno te wiegi yai homu kolesaga me konea sabeo. God te tedali wiegi yai doloba pai mu dao, tiali goli eno aga me konebeo.

⁴De te dagaluba ugwa holama, te tǫba aiya ma dulaliwe? Tama dego te asobo wali te nogogo tola saliwe? Tama dego te pǫde wę muani, te bidigo nai me deli te name ugwade munama, tama halubo tiwai yaliwe? Dego te tǫ habu ununani tigidali dąų walama, tama megi tǫ elalubawe? Aga nogi, me aga ogwago nogi de dawe? Te nago koneba, agawe?”

⁵“Godigo po te mu po naga dao. Te agai yaibao po wali sę tigidali, te mu pedelai. Tama agaba pabo bidi tigidali te agai bugagia obo elaluyu, te hwįbo sogo te ami bidi te sabelego bugagia tigi bea sabo tiwai ebo dao.

⁶Naga po digi nago te po weyu, te po te Godigo po dao me wagio. Tiyu, agai nage wado iliyu, tama nosali tigidali we bidigo koneyu, nage te tibo po wabo bidi da po wabuo,” wali.

⁷“God, eno te nai si po nageba hanaluabo homu ebao, tama eno homugo nago enabolo momainu homu ebao, te ena tǫde bidibo tigidali sogo

⁸nago ena tau somainu eyu, tama eno te tobage tibo po wabo kolesaga dabe te tudiba munama, tama nago ena te mone hauwa elalubo bidi pedalumainu eyu, ma te magi nai meni ebo bidi tiwai pedalumainu eyu me egio. Menio. Nago te ena usu nama nai tama mobaso, te usu dao.

⁹Tiyu, eno doado bage hauwa mu elalubaso, tama eno nage tudiba muyu, tama eno te po waidalio, ‘Genuai Bidi de dawe?’ Tama tiyu, ena te magi nai meni yai bidi pedaluyu, tama eno te nai dabe wi siyu, tama eno God nago nogi aiyaba elaluidalio,” wali.

¹⁰“Nage te sę tonalubo bosman bidiba pelama, tama agai sę ebo bidiba posobo po me wagi pelamuo. Tiyu, te sę bidigo nageba te dwai sę emainu i ola mabo po obaso da, tama te nage sęgę elaluabuo.”

¹¹“Te meba bidi dabego te po wabo dao, Godigo te augwa aya idabolo te dwai sę emainao wabo dao.

¹²Te meba bidi dabego te homu ebo dao, augwa te magi nai me delide te magi dwai sę me ebeo homu yali. Tiali goli, augwa sęgę te elalubadi, tama augwali te God gedude meda mu yai bidibao.

¹³Te meba bidi dabego homugo augwali te wiegi yai mu da homu elama, tama gasa bidi dabe te olo bage te olo tiwai da homu ebo dao.

¹⁴Te meba bidigo te magi nai meni yai bidi dabeba te dwai sę mu ilaibao. Te hwą bainat me ge hwą me te augwa pedauwalide pągąnalubo tiwai eyu, tama augwaligo te magi nai meni yai bidi dabe tulama, tama tigidali silabo homu ebo dao.”

¹⁵“Te bidi kaneme sabo dwasianu hasamani te benago te wegi si elalubao. Augwa si nogi sabi si tobage elalubao, te tiwai, Ena Mao.” “Te nai selago te augwa sabo naide te usu dao po munu me wagobeo. Awe, te nai me si me sigo te augwa homu wei ebo, te siminabo me elalubao. Augwali e dao:

¹⁶Te isali bidi dabego gų page dao, me te bidigo sali te wai ame nisiąwai we, me tama tǫgo te wę sali, tiali digi aga te wę hauwa mu sabo homu ebao, me te siago te nai dabe dela siliyu, tiali digi te nai dabe te agade usu meni yaibao.”

¹⁷“Te aga aya idago po sela sąbo bidigo, tama te posobo po augwali siba obaso da, teda aga te isibo sogo te aga tigi me pubalugobeo. Teda te gedeli dabe, me te genuai kemodage ba dabe aselama, aga gedu gudulama, tama aga tigi mi tuaibao.”

¹⁸“Te ena midigi sabo ilibo nai sela te elalubao. E, sela naga meni, te gasagi yai nai mu me si me si te eno augwali konesiąbo nai te elalubao.

¹⁹Te ugwadu bola soabo kemodage bago kolesaga, tama te mone masigi daide ugwadu soabo hasamanigo kolesaga me, tama te genuai tamu ąįdu bilibo sipgo kolesaga me, tama te bidigo we wei homu ebo kolesaga me, te tama te eno augwali konesiąbo nai me si me si elalubao,” wali.

²⁰“Te wego te we sabo togobo penani ebo kolesaga te tiwai. Aga nai tulama, tama pedauwali tedelama, tama nosali agai te po wai, ‘Eno te magi dwai sę me ebeo,’ wabo dao.”

²¹“Te kolesaga sela, woo, te me si me si te tǫde pedelama elalubao. Te kolesaga dabe te dwai mu elama, tama te tǫ aga digi te kolesaga dabe wei isiąbo homu elama, tama te didibili umabo mu ebao.