Bugagia Bidibo Kolesagade Po Asęai Buku 30:15-33

¹⁵“Te bidi kaneme sabo dwasianu hasamani te benago te wegi si elalubao. Augwa si nogi sabi si tobage elalubao, te tiwai, Ena Mao.” “Te nai selago te augwa sabo naide te usu dao po munu me wagobeo. Awe, te nai me si me sigo te augwa homu wei ebo, te siminabo me elalubao. Augwali e dao:

¹⁶Te isali bidi dabego gų page dao, me te bidigo sali te wai ame nisiąwai we, me tama tǫgo te wę sali, tiali digi aga te wę hauwa mu sabo homu ebao, me te siago te nai dabe dela siliyu, tiali digi te nai dabe te agade usu meni yaibao.”

¹⁷“Te aga aya idago po sela sąbo bidigo, tama te posobo po augwali siba obaso da, teda aga te isibo sogo te aga tigi me pubalugobeo. Teda te gedeli dabe, me te genuai kemodage ba dabe aselama, aga gedu gudulama, tama aga tigi mi tuaibao.”

¹⁸“Te ena midigi sabo ilibo nai sela te elalubao. E, sela naga meni, te gasagi yai nai mu me si me si te eno augwali konesiąbo nai te elalubao.

¹⁹Te ugwadu bola soabo kemodage bago kolesaga, tama te mone masigi daide ugwadu soabo hasamanigo kolesaga me, tama te genuai tamu ąįdu bilibo sipgo kolesaga me, tama te bidigo we wei homu ebo kolesaga me, te tama te eno augwali konesiąbo nai me si me si elalubao,” wali.

²⁰“Te wego te we sabo togobo penani ebo kolesaga te tiwai. Aga nai tulama, tama pedauwali tedelama, tama nosali agai te po wai, ‘Eno te magi dwai sę me ebeo,’ wabo dao.”

²¹“Te kolesaga sela, woo, te me si me si te tǫde pedelama elalubao. Te kolesaga dabe te dwai mu elama, tama te tǫ aga digi te kolesaga dabe wei isiąbo homu elama, tama te didibili umabo mu ebao.

²²Te kolesaga dabe te tama telalubao. Te olo sę bidigo aga te king pedalubo sogo ebo kolesaga me, tama te homu kolesaga menisąwai bidigo te aga nai hauwa tubo sogo ebo kolesaga me,

²³tama te bidi me deligo te we bidi dabego wei menisąwai we siyu, te we aga dali bidibo kolesaga ebo, tama te sę ebo wego te aga tonaluali wego sę yali pesage hasegelama sabo sogo ebo kolesaga, te tama telalubao.”

²⁴“Te e tǫde te tobage hasa me si me si tama dwasianu hasamani me elalubao, tiali goli augwa te homu kolesaga te wiegi yai mu elalubo dao. Augwali e dao.

²⁵Te sagado dabego bomo me elalubeo, tiali goli augwa te nai sǫą pabo sogo tuabo nai te sabobo dao.

²⁶Te gesia dabe te masigi gabalode bidibao, augwaligo me te bomo meni yai, tiali goli augwa te genuai masigi dabe tomode te bidabo be nigilama bidibao.

²⁷Te kuli mano dabe augwa tobolu bidi king te menibadi goli, tiali te augwa lain bugagia wasilama bilibo dao.

²⁸Te dwasianu yalawai yoganu dabe, dago nogogo sabo usu goli, tiali digi augwa te kingo genuai bede bidibo dao.”

²⁹“Te gasa boma pai mu bilibo nai te sela, ma me si me si elalubao. Augwali e dao.

³⁰Te laion dabe te boma pai mu elaluyu, te gasa hasa sibi aiyaba elalubo dao. Te augwali bilibo sogo, augwali te magi nai me delide wi me eyu me egobeo.

³¹Me te omai ba kakaruk dabego te tobolu ugwaba dodolama bilibo dao, tama te omai kibu meme dabe me tama tibo dao. Me te kingo te aga bomo mu eyu ebo sogo te boi bidi dabego agai aiyaba elaluainu ebaso, usu me egobeo.”

³²“Te nago dobo sę ebo kolesaga eyu, tama nago hagoma eyu, naga digi nogi ugwaba siyu, ma nago dwai kolesaga yabo homu ebaso da, teda nago pedauwali pania selama, tama te kolesaga tagalao.

³³Te nago bulmakaugo ame tola selama, tama nago pepegane da, teda te ame pę bata pedelaibao. Tama te tiwai me nago te bidi me deligo guniba elibaso da, teda te kaneme pedelaibao. Te tama tiwai naga, te nago te bidi dabe wado po omainu ilibaso da, teda te hwįbo dao,” wali.