Bugagia Bidibo Kolesagade Po Asęai Buku 29:17-27

¹⁷Te nago naga ogwa dodolobaso da, te agai wiegi yai kolesaga ebaso, tama nago homu nagame igulama, tama nage wiegi yai homu pemene yaibao.

¹⁸Te Genuai Bidigo po te we bidibolo masiąwai menigi sogo da, teda augwaligo te haniani dwai kolesaga igi da. Tiali goli, te bidigo Godigo bomai po wali pali da, teda aga wiegi yai homu pemene eyu, bugagia bidaibao.

¹⁹Te nago naga sę bidi dali te pogo naga po obaso da, teda nago te agai kolesaga me dodolobaso, usu me egobeo. Agai nago te po odali digi te tagalao, agai wali me pogobeo.

²⁰Te bidi me deli aga te wiegi yai homu me elalusiąbo bidi yai baso da, teda dago aga tau selama, te aga wiegi yai kolesaga konea somainu homu yao. Tiali goli, te bidigo po homu kone palama, bugagia po wasiąbo bidi yai baso da, teda dago aga tau sabo sę ebo dene mu yaibao.

²¹Te nago naga sę bidiba te aga dwasianu elalubo sogo gagalasa, te doado bage madubadi geai baso da, teda nosali te aga nago ogwa mu tiwai pedelaibao.

²²Te haliga sębę polo ebo bidigo te gasa bidi dabego te wado po omainu ilibao, tama aga digi te dwai sę hauwa ebo dao.

²³Te bidigo hagoma homu eyu, tama aga digi aga nogi ugaba sobaso da, te augwaligo aga nogi aiyaba elaluaibao. Tiali goli, te bidi aga digi aga nogi aiyaba elalubo bidi da, te genuai nogi saibao.

²⁴Te bidigo te nai wi sabo bidi tau sobaso da, teda agaba digi te boi bidi ebao. Te agai te augwali sigo ebo kolesaga hanilibaso da, te augwaligo aga po tų ilaibao. Tiali goli, te agai geme dualubaso da, teda Godigo aga dolaibao.

²⁵Te aga gasa bidi dabede wi ebaso da, te wa me deli kekelama, tama aga digi te tubo te tiwai ebao. Tiali goli, te bidigo homu Genuai Bidiba bomo elama dąų obaso da, te aga bugagia bidaibao.

²⁶Te bidi hauwago te bulu tǫ kantri tonalubo tuni bidi dali te homu bega sabo po weyu, te agai augwali wei homu emainogo tebao. Tiali goli, Genuai Bidi agaduba deligo naga te dago po dolo dagaluyu, tama da tau sabo dao.

²⁷Te doloba pai kolesaga ebo bidi dabego te dwai kolesaga ebo bidi dabe wei homu me egobeo. Tama te dwai kolesaga ebo bidi dabego te wiegi yai doloba pai kolesaga wali pabo bidi dabe wei homu mu me egobeo.