Bugagia Bidibo Kolesagade Po Asęai Buku 22:19-29

¹⁹Megi naga eno te po pusainu ebao, te naga digi odolama, tama nago konealubo homu te Genuai Bidiba dąų mu omainu yaibao.

²⁰Eno te 30 wiegi yai po asęyu, te nage bugagia ola mayu, tama te wiegi yai homu konebo kolesaga te nageba mobao.

²¹Tama tialima, nago te po page mu konemainu ebao. Tama te bidi dabego nage tagala palu, te mena po te mu po yaliwe naga konea pomainu ebo sogo da, teda nago te mu koneama, tama te po dolo augwaliba ponaibao. (1)

²²Nago homugo te magi nai doado bage meni yai bidi dabe, augwali te olo bidi naga da homu elama, tama nago augwaligo doado bage odolali me kekelama sigio. Tama augwali te po tųba sabalubo sogo da, teda nago te augwali aiyaba elaluabo po tų me igio,

²³magi baso meni, Genuai Bidigo augwali tonaluyu, tama augwali tau saibao. Tama te bidigo te magi nai doado bage meni yai bidi dabeba te dwai sę ebaso da, teda Genuai Bidigo te bidi agaba te dwai sę wei ponobo dao. (2)

²⁴Nago te wado po polo wabo bidi dabe dali, me te sębę polo ebo bidi dabe dali abagi me wagio.

²⁵Tiyu, nago augwaligo ebo kolesaga selama, tama nosali te dwai nai dabego nage dolabuo. (3)

²⁶Te bidi me deligo negeli sabo sogo, te negeli sali bidi aga digi ponabo te usu isąbaso, te nago te negeli sali wei ponabo po dąų waligio.

²⁷Tiyu, nago begelabo usu isąbaso, tama augwali aselama, te nago doado bage sigidali, me te nago bet me sagasabuo. (4)

²⁸Nago te naga wąį nǫų dabego te nago tǫ polobadu dąį ilali te ma kidiligio. (5)

²⁹Te bidigo wiegi yai sę ebaso da, teda aga te kingo sę bidi pedelaibao. Te tobage bidi te nogi meni yai bidigo sę bidi me pedalugobeo.