Bugagia Bidibo Kolesagade Po Asęai Buku 21:7-24

⁷Te dwai kolesaga ebo bidi dabego te wiegi yai kolesaga ebo hagela homu ebo dao. Augwaligo te gasa bidi dabe dolobo sę idu gebo dao. Tama tialima, augwa te kolesagago digi te augwa silabo sę ebo dao.

⁸Te dwai sę ebo bidigo te tibo kolesaga yali. Tiali goli, te magi dwai sę me isąwani bidi dabe, augwaligo te doloba pai kolesaga yaibao.

⁹Te bidi agaduba deli te be pedude dulaluali bidi da, te kolesagago te be tomode te wado po wabo me te po hauwa wabo we dali bidibo kolesaga te aiyaba elalubao.

¹⁰Te dwai kolesaga ebo bidi dabe, augwali te dwai sę hauwa yabo te nasi tiwai ebao. Augwaligo te bidi me deliba te homu dene eyu tau mabo kolesaga me egobeo.

¹¹Te augwaligo te hagoma ebo bidiba te dwai dene mobaso da, teda te homu kolesaga elalusiąbo bidigo sulama, tama agai te wiegi yai homu me kolesaga saibao. Tiali goli, augwaligo te wiegi yai homu kolesaga elalubo bidi ola mobaso da, teda agai konebo kolesaga te wiegi yai mu pedelaibao.

¹²Te Genuai Bidigo kolesaga te dolo mu ebao, tama agai te dwai kolesaga ebo bidi dabego te augwa be tomode te tigidali sę ebo te agai koneanio. Tama Genuai Bidigo te bidi dabe dolaibao.

¹³Te nago olo pania selama, tama te doado bage meni yai bidi dabego augwali tau somainu nageba i wabo nago odisąbaso da, teda nosali me te bidi dabe augwaligo te nago i wabo me odogobeo.

¹⁴Te bidi me deligo gasa bidiba wado po obaso da, teda te we bidi dabego aga susiąbadi te sogo agai agabolo te wiegi yai homu pemene ebo nai mobaso, tama te agai wado po wali te silaibao.

¹⁵Te we bidi dabego te po tų ebode wiegi yai doloba pai kolesaga wali pabo sogo, te wiegi yai we bidi dabego sulama, tama pemene yaibao. Tiali goli, te dwai kolesaga ebo bidi dabego sulama, te augwali wi mu ebo dao.

¹⁶Bidigo te wiegi yai homu kolesaga ebo sunumi te tagalubo bidi da, te isilama, tama te isali bidi dabe dali bidigi paibao.

¹⁷Te bidigo te wiegi yai nai me wę tuabo homu wei ebo kolesagade pemene homu ebaso da, teda te aga mone silama, tama aga te doado bage sǫą paibao.

¹⁸Te sęgę te doloba pai bidiba pedelainu ebaso da, teda te dwai kolesaga ebo bidi dabego augwali hasegelama, tama te sęgę augwaligo sabo dao.

¹⁹Te bidi te olo masigi kemi pesagede bidibaso, te kolesagago te wado po wabo me te po hauwa wabo we dali bidibo kolesaga te aiyaba elalubao.

²⁰Te wiegi yai homu elalubo bidigo, agai te aga beba te tobage wiegi yai nai dabe saboyu, sisinaibao. Tiali goli, te wiegi yai homu elalusiąbo bidigo, augwaligo te augwa doado bage dabe silibo dao.

²¹Te bidigo doloba pai kolesaga wali peyu, tama te bidi dabe godolo homu mu ebaso da, teda aga bugagia bidiyu, tama augwaligo doloba pai kolesaga agaba eyu, tama genuai nogi aga mawaibao.

²²Te wiegi yai homu elalubo bidigo te ami bidi dabeba te taun sabo wiegi yai sunumi te ola mobaso, usu yaibao. Te taun tomode bidibo bidi dabego te homu eyu, te taun bagulali obo te bomai obo elalubo homu eyu, tama te boi bidi dabego aluagasu, te dolobo usu me egobe da, te homu yali. Tiali goli, te ami bidi dabego hwįgi pelama, te taunde bidali bomai ami dabe aiyaba elaluama, tama te taun selama, te taun bagulali obo dolobadi yaibao.

²³Te bidigo aga wabo po bugagia tonalubaso da, teda te sęgęgo aga me gegegobeo.

²⁴Te gana pabo bidigo te hagoma eyu, tama te posobo po gasa bidiba waibao. Sesemane sogo te aga digi aga nogi ugwaba sabo bomo ebo dao.