Bugagia Bidibo Kolesagade Po Asęai Buku 18:1-23

¹Te abagi homu isiąbo bidigo, agai homu te agade digi naga elaluaibao. Te gasa bidi dabego te wiegi yai homu elalubo te tagalu, te bidigo te augwaligo ebo homuba wei eyu godolo me egobeo.

²Te wiegi yai homu elalusiąbo bidigo te wiegi yai homu kolesaga koneainu wei me egobeo. Menio. Agai te hagoma yabo homu naga eyu, tama aga homugo digi ebo kolesaga pusubo dao.

³Te dwai kolesaga ebo bidigo, agai homugo te olo bidi dabe te olo bage tiwai homu yaibao. Tama agai augwali nogi dolama, tama augwali hale ebo sę ilibo dao.

⁴Te wiegi yai homu elalubo bidigo po weyu da, teda agai po te nai mu elama, tama te wiegi yai homu kolesaga hauwa te pode pągąnalu, te wę te ulu węde pedalubo tiwai elama, te wę geliyu soyu, te pabo tiwai ebo dao.

⁵Te bidigo dwai sę elama, te po tųba doligi pobaso da, teda nago aga tau me sigio. Tiyu, nago te dwai sę isiąwani bidigo sunumi te palibaso, tama agai te po tųde ugwaba ela holobo yabo usu isąyabuo.

⁶Te wiegi yai homu kolesaga elalusiąbo bidigo te gasa bidi dabe dali te konila po waibao. Tama augwaligo agai po odainu ebo sogo, augwaligo te aga keloago elabo homu ebo dao.

⁷Te wiegi yai homu kolesaga me elalusiąbo bidigo, agai te po obaso da, teda aga pogo digi aga dolaibao. Awe, te aga digi te wa kekelama, tama te wago aga tola siyu, tama aga dolaibao.

⁸Dago te bidigo gasa bidiba te posobo po wabo odobo te wei mu ebo da. Te tobage po te pusai nai tiwai eyu, tama polo tama dago tubo dao.

⁹Hagela bidi da, te doado bage dabe dolobo bidi tiwai tobage bidi dao.

¹⁰Genuai Bidi te bomai be me deli elalubo tiwai ebao. Te doloba pai kolesaga ebo bidi dabe augwa te beba udula sobaso, tama bugagia bidaibao.

¹¹Tiali goli, te mone hauwa elalubo bidi dabego te homu eyu, te augwa mone dabego te augwali bagulalu, tama augwali bugagia bidiyu, te bomai obo elalubo taun tiwai da homu ebo dao.

¹²Te bidigo hagoma eyu, te aga digi aga nogi ugwaba sobaso da, teda te nosali aga dolaibao. Te hasia bolo naga digi naga aiyaba elalusiąbaso da, teda nago te genuai nogi me sogobeo.

¹³Te hasia bolo bugagia olo munama, tama nosali nago te po wei ponao. Nago tiwai isiąyu da, teda nago te dobo kolesaga eyu, tama nage hale saibao.

¹⁴Te bidi gasi elalu, tama aga homu kolesaga te bomo elalubaso da, teda agai te gasi aiyaba elalueibao. Tiali goli, te bidigo homu kolesaga dolali da, teda magi elama te wiegi yai ma pedelaibawe?

¹⁵Te wiegi yai homu kolesaga elalubo bidigo, agai te haniani nai dabede homu konea sabo sę bomo ebo dao. Agai olo te aga ola mawainu ebo bidiba bugagia mubo dao.

¹⁶Te nago te genuai bidi me deli dali po miainogo da, teda nago te agaba te wiegi yai homu ilabo nai me deli selasa pobaso, tama te agai te nage agaba asomainu yaibao.

¹⁷Te bidi me deli te po tųba doligi pelama, te po mibo sogo, te agai po te ugwaba ela holobo ąǫ yai. Tiali goli, te gasa bidigo agaba hanalu, te po page hanilama wao po wabo sogo, te bidi dabego te dego mu ela hologowe, te me konebeo.

¹⁸Te po tųde te genuai bidi si te tomode dodolabo te usu isąbaso da, teda te po tųgo e satu gagali elama, tama te po tų ugwaba ela holabo bidi dolo ponaibao.

¹⁹Nago te naga amago dwai haliga nage dali emainu ilai baso da, teda agai te aga homu bea selama, tama nage wei homu isiąyu, te bulu bagego te taun obo tomoba pabo obo sunumi te palia selama, tama te gasa bidi dabe te tomoba pabo usu isiąbo tiwai yaibao. Te bidi si te konila po wado olama, tama te nogo masiąwani da, teda tego te augwa si sunumi palialubo tiwai eyu, tama augwa si te deli haliga pedalisiąma, te bomai sunumigo te bidi soabo sunumi panialubo tiwai ebao, tama aga te be tomoba pabo usu me egobeo.

²⁰Te nago po wiegi yai obaso da, te nago haliga wiegi yai pemene yaibao.

²¹Te nago pogo bidi bugagia bidabo bomo elalubao. Me ma, nago pogo te bidi dolabo bomo me elalubao. Tama tiyu, nago wiegi yai po wabo kolesaga wei eyu da, te nage bugagia bidaibao.

²²Te nago we deli siyu da, te wiegi yai mu da. Te tama tiwai ola mani, Godigo te wiegi yai pemene elama, tama nageba te bugai haliga emainu tebao.

²³Te magi nai doado bage meni yai bidigo te nagame yai po dua digi te mone hauwa elalubo bidi dali weyu, tama agaba hanalu te aga tau somainu yali. Tiali goli, te mone hauwa elalubo bidigo te sesanobo po bomonama agaba wei ponobo dao.