Bugagia Bidibo Kolesagade Po Asęai Buku 17:7-28

⁷Te wiegi yai po wabo kolesaga te wiegi yai homu elalusiąbo bidigo homu kolesaga tiwai me elalugobeo. Tama mu tama, te tibo po wabo kolesaga te genuai bidigo kolesaga te tama me telalubeo.

⁸Te homu bega sabo mone mabo bidi, agai te homu yai, te homu bega siyu mabo mone te aga tau sabo mone tiwai da weyu, te tobage magi sę dabe aga digi homugo yainogo tebo dao.

⁹Te bidi aga abagi dabe dali bugagia bidimainu homu ebaso da, teda agai te augwaligo yali dwai sę haniligobeo. Tiali goli, te bidi me deligo te dwai sę yai po me deli po ola bilibaso da, teda agai te bidigo aga abagi dali wado po omainu ebao.

¹⁰Te nago te wiegi yai homu elalubo bidi dodolabo homu ebaso da, teda nago te deli sogo naga agaba obaso, tama teda agai te genuai kolesaga mu saibao. Tiali goli, nago te wiegi yai homu elalusiąbo bidi dodolabo homu eyu da, teda nago aga te bidi sese a naga te 100 sogo te aga elibo sę eyu dodolaibao, tiali goli te agai kolesaga me hasegeligobeo.

¹¹Te dwai kolesaga ebo bidigo, agai te hagoma eyu, tama te wąbi hwįbo sę hodolaibao. Tiali goli, te augwaligo te homu dene isąbo bidi me deli tagala palama, tama agaba te dene mabo sę umabo mu yaibao.

¹²Te augwaligo te bea hasa kimigo wai dabe wi selasa sobadi, te bea kimi te sunumide gesabidi pogolu da, teda te nai te dwai dao. Tiali goli, te wiegi yai homu elalusiąbo bidigo te dobo kolesaga geda mubo sę eyu, tama nago aga te gesabidi pogolu da, teda te nai te dwai mu dao.

¹³Tama augwaligo te bidi me deli dali wiegi yai kolesaga ebadi, tama te bidigo dwai kolesaga augwaliba wei ponobaso da, teda sesemane sogo te aga we wai bidalubo kolesaga te dwai elaluaibao.

¹⁴Bidigo te wado po me deli wali, te tobage te bidigo te obo agebelidu te dwasianu dedage nigilama, te genuai wę gebo domainu palibo tiwai ebao. Te tama tebo kolesaga agai tagalu da, tama te genuai wado me pedalugobeo.

¹⁵Genuai Bidigo te kolesaga si te hagela homu mu ebo dao. Te dwai kolesaga ebo bidi dabe olo tagalubo kolesaga, me te dwai kolesaga isiąwai bidi dabeba dene mabo sę, te kolesaga si agai gedude dwai mu dao.

¹⁶Te wiegi yai homu kolesaga elalusiąbo bidi, te agai tobolu te dąų ola sigi pelama, tama agai te kolesaga me konegobeo. Tama tialima, magi baso agai te skul fi mone sela asaliwe?

¹⁷Te wiegi yai abagi dabego te da sesemane sogo wei homu yaibao. Mu tama, te ama dabego te da ama dabego te da sęgę ebo sogo tau sainu tonalubo dao.

¹⁸Te homu kolesaga meni yai bidi dabe, augwaligo naga te gasa bidigo nai wei ponabo bidi usu meni ebaso, te gasa bidigo nai wei ponabo po dąų wabo dao.

¹⁹Te dwai kolesaga yabo wei homu ebo bidigo, agai te konila po wabo hodolobo sę me wei yaibao. Tama te bidi aga digi aga nogi ugwaba sabo bidi, aga te dolobo sę iduaibao.

²⁰Te dwai homu idu, te dwai tibo po sesemane odubo bidi da, aga te bugagia me bidigobeo. Menio. Agai te dwai sę naga iduaibao.

²¹Te ogwago homu wiegi yai me elalusiąbaso da, teda aga aya te haliga sęgę mu yaibao. Awe, te bidi aga ogwade dwagi yai homu egobeo.

²²Te bugai haliga ebo kolesaga te bidi bugagia bidimainu mabo marasin tiwai ebao. Tiali goli, te bidigo homu dolobaso da, te dwai gasigo te bidigo tigi dili dabe tomode te dolobo sę ebo tiwai ebao.

²³Te dwai kolesaga ebo bidi dabe, augwaligo te po tų yabo sę elalubaso da, teda augwaligo te po tų dolabo homu ebo dao. Tama tiyu, augwaligo te homu bega sabo mone mabo te bidi dabego susiąbadi te sogo geme saibao.

²⁴Te kolesaga koneai bidi, agai te wiegi yai doloba pai kolesaga sabo sę bomo yaibao. Tiali goli, te wiegi yai homu kolesaga elalusiąbo bidigo, agai te haniani nai dabe sesa bilabo sę bomo ebo dao.

²⁵Te bidigo te esela pabo bidigo kolesaga tiwai wali pobaso da, te aga aya ida te dwai haliga elama, tama haliga sęgę mu ebo dao.

²⁶Te po tųde te po weyu, te dwai sę isiąwai bidigo te po tų ebo abelao po wabo te po dolo wabeo. Tama te genuai bidi dabego te doloba pai kolesaga yai digi da, te augwali keloago elibo sę, te dolo meni.

²⁷Te genuai kolesaga koneai elalubo bidi, te agai po hauwa me midugobeo. Tama te wiegi yai homu kolesaga elalubo bidi, te aga iminasa bidibo dao.

²⁸Te wiegi yai homu kolesaga elalusiąbo bidigo, agai pedauwali pania sobaso da, teda te bidi dabego homugo agai te wiegi yai homu kolesaga koneai elalubo homu yaibao.