Bugagia Bidibo Kolesagade Po Asęai Buku 15:6-30

⁶Te doloba pai bidi dabego augwa bede te doado bage hauwa elalueibao. Tiali goli, te dwai sę ebo bidi dabego monede te augwaba sęgę pedelaibao.

⁷Te wiegi yai homu elalubo bidi dabego te wiegi yai homu te we bidi dabeba mabo dao. Tiali goli, te wiegi yai homu elalusiąbo bidi dabego te tiwai me egobeo.

⁸Genuai Bidigo te dwai kolesaga ebo bidigo ofa ebo te wei mu me egobeo. Menio. Agai tede dwai homu mu ebo dao. Tiali goli, agai te doloba pai bidigo gedu haluasa po wabo te wei mu eyu, wiegi yai pemene mu ebo dao.

⁹Genuai Bidigo te dwai kolesaga ebo bidigo ebo kolesaga te wei mu me isiąyu, tede dwai homu mu ebo dao. Tiali goli, agai te doloba pai kolesaga wali mu pabo sę ebo bidi dabe wei mu ebo dao.

¹⁰Te doloba pai sunumi tagalobo bidi da, teda dwai dene mu saibao. Tama te gasa bidi dabego aga dodolomainu isiąbo bidi da, teda aga isaibao.

¹¹Genuai Bidigo te isali bidi dabe te augwali bidibo pesage me subo dao. Te tiwai usu yaligo da, teda agai te da tǫde we bidigo homu kone palobo kolesaga te tigidali me konea silibo dao.

¹²Te hagoma ebo bidigo te gasa bidigo aga dodolainu ebo hagela homu yaibao, tama agai te wiegi yai homu elalubo bidiba hanalu, te agabolo te wiegi yai homu kolesaga momainu me egobeo.

¹³Te bidigo haliga te wiegi yai pemene ebaso da, teda agai gesabidi me te wiegi yai eyu, pisigina paibao. Tiali goli, te bidigo haliga te sęgę elalu da, teda aga dwai bidibao.

¹⁴Te wiegi yai homu elalubo bidigo te tobage wiegi yai kolesaga koneabo sę bomo idu gebo dao. Tiali goli, te wiegi yai homu meni yai bidi, agai te geda mubo po sesemane bomo elama, udaibao.

¹⁵Te doado bage sǫą pabo bidi da, aga te dwai bididu, tama te genuai sęgę sesemane elaluaibao. Tiali goli, aga te bugai haliga eyu, pemene ebo bidigo da, teda te tigidali side te genuai nai da tubo side tiwai elalueibao.

¹⁶Te nago doado bage dwasianu naga elalu, tama nage te Genuai Bidide wi eyu, aga dologoba pelama bidibaso da, teda nago bidibo ulago te genuai mone pesage holai elalubo, me te dwai sę ebo doado bage hauwa elalubo bidigo bidibo ula te aiyaba elaluaibao.

¹⁷Te bidi godolo homu ebo kolesaga, te polalubo homu kolesaga dao. Tama tiyu, nage te naga abagi dabe dali bidiyu, tama dagego te donai naga tubaso da, te dwagi yai dao. Ma, nage te godolo homu isiąbo bidi dabe dali bidiyu, tama dagego te bulmakau kibu mi tubao, te dwagi yai menio.

¹⁸Te haliga sębę polo ebo bidigo te gasa bidi dabego wado po omainu ilaibao. Tiali goli, haliga nagame ebo bidigo da, te bidi dabego wado po wabo te homu aiyaba elaluama, tama augwa deli homu ma elama bidibo dao.

¹⁹Te hagela bidigo te aga bidibo ula te dwai mu da, te homu yaibao, te aga busi sunumidu pabo tiwai yali. Tiali goli, te doloba pai bidigo koneai, te aga bidibo ula te wiegi yai mu da wali, te aga genuai sunumidu pabo tiwai ebo dao.

²⁰Te ogwago wiegi yai homu me kolesaga elalubaso da, teda aga aya ida wiegi yai homu pemene yao. Tiali goli, ogwago te esela pabo bidigo kolesaga tiwai ebaso da, teda agai te aga aya ida godolo homu menisiąyu tebao.

²¹Te wiegi yai homu elalusiąbo bidigo te tobage dobo homu ebo kolesagade pemene yaibao. Tiali goli, te doloba pai homu kolesaga elalubo bidigo te doloba pai kolesaga sesemane sogo wali pabo dao.

²²Te nago sę meba yainogo da, teda hasia bolo nago te homu kolesaga te gasa bidi hauwade sao, tama nago sę te wiegi yai pedalumainao. Nago te tiwai sę isiąwani da, teda nage odolali sę dene yaibao.

²³Te bidi dabe po mibadi, tama nago te wiegi yai sogo ebo te tonaluama, tama nago te wiegi yai po me deli weyu da, teda nage pemene yaibao. Awe, nago pode te gasa bidi dabe me dwagi yai homu yaibao.

²⁴Te wiegi yai homu elalubo bidigo da, te sunumidu ugwaba holama, te aga bidabo ula saibao. Tama tialima, aga te isali bidi dabego pesageba me dulugobeo.

²⁵God Genuai Bidigo te bidi aga digi aga nogi ugwaba sabo bidigo be dolaibao. Tiali goli, agai te wilawe we agai tau siyu, tama te gasa bidigo te wego tǫ sidali weyu te tama tiaibao.

²⁶Te tobage dwai homu kolesaga ebo dabe te Genuai Bidigo gedude te dwai kugumini nai tiwai ebao. Tiali goli, te wiegi yai meda menisąwai we bidigo homu kolesaga te aga gedude te dwagi yai dao.

²⁷Te monede pesą eyu ebo bidigo tama te mone sainu te tobage haniani dwai kolesaga ebaso da, teda agai te dwai sęgę te aga we wai dabede te pedalubao. Tiali goli, te gasa bidi dabego te haniani dwai sęde te mone mabo sisąbo bidi da, teda aga te bugagia bidaibao.

²⁸Te doloba pai bidigo te homu kone bolo palaibao, tama nosali agai te gasa bidiba po wei ponaibao. Tiali goli, te dwai sę ebo bidigo po wabo sogo, agai te dwai po naga polo subigila wabo dao.

²⁹Genuai Bidi te dwai kolesaga ebo bidi dabede te digibulu bidibao. Tiali goli, agai te doloba pai bidi dabego gedu haluasa po waboba olo mubo dao.

³⁰Te nago bidigo gesabidi te wiegi yai elalu, tama aga te gisugu udubo subaso da, teda nage bugai haliga yaibao. Tama nago te dwagi yai gesi po odobaso da, teda tego te nago tigi dąų walubao.