Bugagia Bidibo Kolesagade Po Asęai Buku 14:5-33

⁵Te suali po pusubo bidigo te po mu po da weyu da, teda agai te po tųde doloba pai po naga pusaibao. Tiali goli, aga te tibo po wabo bidi yai baso da, teda agai po tigidali te dolo me egobeo.

⁶Te hagoma bidi dabego te wiegi yai homu kolesaga sabo homu eyu da, teda augwaligo usu me egobeo. Tiali goli, te wiegi yai homu elalubo bidigo da, te agai da te sę dene isiąyu, te gasa wiegi yai kolesaga sabo dao.

⁷Te wiegi yai homu kolesaga meni yani bidi dabede digibulu bidao. Te augwaligo nageba te wiegi yai homu kolesaga me magobeo.

⁸Te wiegi yai homu elalubo bidigo te aga bilibo homu kolesaga te bugagia homu kone palaibao. Tiali goli, te wiegi yai homu meni yani bidi dabe te augwa digi tibo po ola mawaibao, magi baso meni, te augwaligo homu kolesaga te geda mubo dao.

⁹Te wiegi yai homu meni yani bidi dabego, augwa te deli haliga elalubao, te dwai sęgę sabo kolesaga dao. Tiali goli, te doloba pai bidi dabego augwade digi te wiegi yai kolesaga eyu, tama augwa deli haliga naga elama bidibo dao.

¹⁰Te bidigo agade digi haliga sęgę ebo koneama, tama aga digi te pemene yabo koneani, tama agai te gasa bidiba me hanilibaso, usu egobeo.

¹¹Te bidi dwaigo we wai hani sibi te mu dolama, tama sia saibao. Tiali goli, te doloba pai bidigo hani da, te bomai hani mu pedelaibao.

¹²Bidi mebago te homu eyu, te augwa kolesaga te wiegi yai da homu elama, tama augwa te wiegi yai sunumi wali poba homu yai. Tiali goli, menio. Augwa te sę elala pidubadi genama, tama nosali augwa isaibao.

¹³Te dago gisugu obadi goli tagala, te haliga sęgę elalubogo te da me tagalogobeo. Tama te wiegi yai pemene ebo homu silai madi, te haliga sęgę ebo te me elaludaibao.

¹⁴Te dwai sę ebo bidi dabego te augwa ebo dwai kolesagade augwa dene dolo saibao. Tiali digi, te wiegi yai bidi dabego da, te augwa digi ebo wiegi yai kolesagade pemene ebo dao.

¹⁵Te kolesaga dwasianu koneai elalubo bidi dabe augwaligo te haniani po tigidali homuba dąų ola saibao. Tiali goli, te wiegi yai homu kolesaga elalubo bidigo, te aga ebo kolesaga dabe bugagia osola suyu ebo dao.

¹⁶Te wiegi yai homu kolesaga elalubo bidigo da, te Genuai Bidide wi eyu, te bugagia tonalu, tama te sęgę sabo sę dabe te agade ela soaibao. Tiali goli, te wiegi yai homu elalusiąbo bidi, agai te homu eyu, te tobage tigidali sę yabo homu elama, tama agai te ebo kolesagade te homu bugagia me egobeo.

¹⁷Te haliga sębę polo ebo bidi dabego te esela pabo bidigo kolesaga ebo tiwai yaibao. Te bidigo aga homugo ebo kolesaga digi te usu nabo homu ebo bidi te we bidi dabego homude godolo mu me egobeo.

¹⁸Te dwasianu kolesaga koneai elalubo bidi dabego kolesaga, te kolesaga umawai bidigo kolesaga ebo tiwai yaibao. Tiali goli, te wiegi yai homu kolesaga koneani elalubo bidigo kolesaga te augwa tobolude te wiegi yai au tiwai elalubo dao.

¹⁹Te dwai kolesaga ebo bidi dabe da, te doloba pai bidi dabego dologode bidiyu, tama augwaliba te olo tau sabo kolesaga eyu, te augwali tau sao po hanalu waibao.

²⁰Te bidi dabego te doado bage sǫą pabo bidi dabe tau sabo homu wei me isiąyu, te augwa abagi hasi goli te wei isiąyu te tagalaibao. Tiali goli, te mone bidi dabego da, te augwa abagi hauwa elalubo dao.

²¹Te bidigo gasa bidiba dwai po weyu dolobo bidi da, teda aga te dwai sę dolo ebo bidi mu yali. Tiali goli, te doado bage meni yai bidi dabe te bidigo wiegi yai homu elama, te olo mu tau sabo kolesaga ebo bidi da, te aga wiegi yai homu pemene yao.

²²Te dwai kolesaga yabo homu ebo bidi dabe da, teda augwa homu da te mu geda mubao. Tiali goli, te bidi dabego wiegi yai kolesaga emainu homu wei ebo bidi da, te augwaligo agaba te bugai haliga mu ebo dao. Tama augwaligo agaba homugo kęą pabo kolesaga ebo dao.

²³Te nago sę dene ebo sę eyu da, teda nago wiegi yai mone saibao. Tiali goli, te nage olo bididu, tama nago po naga udali da, te nage magi nai meni yai mu bidaibao.

²⁴Te wiegi yai homu elalubo bidigo sali mone me doado bage, tego da ola mobao, augwali dwagi yai homu kolesaga elalubao. Tiali goli, te wiegi yai homu kolesaga elalusiąbo bidi dabe, augwaligo te umuna sai homu kolesaga naga elalubo dao.

²⁵Te suali sę po dolasa te po tų ebode wabo bidi yai baso da, teda te po tųgo te magi sę isąwani bidi me ela po me wagobeo. Tiali goli, te sę suali bidi te witnesgo po te dolasa wasiąwani da, teda aga te tibo po wabo bidi dao.

²⁶Te Genuai Bidide wi eyu, aga dologoba pelama bidibo bidi da, aga da te boma pai madide bidibao, tama te magi nai me delide wi me isąwaibao, tama aga wai puluba dabe me te bugagia bidaibao.

²⁷Te Genuai Bidide wi elama, aga dologoba pelama bidibo kolesaga te bidibo ula mabo ulu wę tiwai ebao. Te kolesagago te bidi tau siyu, te aga dolainu ebo naigo te aga ela soaibao.

²⁸Te kingo te bulu bidi hani hauwa tonalubaso da, teda te bidi dabego te agaba genuai nogi mawaibao. Tiali goli, te kingo dwasianu hani mu tonalubaso da, teda aga te olo bidi tiwai pedelaibao.

²⁹Te haliga polo sębę isiąbo bidi, agai wiegi yai homu elalubao. Tiali goli, te haliga sębę polo ebo bidi aga homugo te punasi kolesaga te polalubo kolesaga da homu ebo dao.

³⁰Te nagame yai homu elalubo bidigo da, teda te bidi aga tigi te bugagia elaluaibao. Tiali goli, te mena nai sabo homu eyu, tama te gasa bidiba te dwai haliga te sesemane ebo bidi da, te kolesaga ebo bidi te dwai gasigo te aga dili dǫgai dabe dolobo tiwai ebao.

³¹Godigo tigidali bidi nigali, tama tiyu, te bidi me deligo te magi doado bage meni yai bidi dabe aiyaba elalubaso da, agai te God aiyaba elalu dolobao. Tiali goli, te magi doado bage meni yai bidi dabe bugagia wiegi yai ilibo kolesaga ebo bidi da, agai te Godiba genuai nogi mabo dao.

³²Te dwai sę ebo bidi dabe te augwa dwai kolesagago digi te dolobao. Tiali goli, te doloba pai bidi dabe te magi nai me delide homu si me egobeo. Te augwa isibo sogo pedalubo si da, te augwa konealubo po te me dąų elalueibao.

³³Te wiegi yai homu elalusiąbo bidi dabego, augwa koneani, te wiegi yai homu koneabo kolesaga te elaluba homu ebo koneai. Tiali goli, aga te wiegi yai homu elalubo bidi dabe dali sesemane bidibo dao.