Bugagia Bidibo Kolesagade Po Asęai Buku 13:4-20

⁴Te hagela bidigo te doado bage hauwa sabo homu wei yali, tiali goli agai me sogobeo. Tiali digi, te sę dene ebo bidi dabego da, te augwa homugo te doado bage hauwa sabo homu yaibao.

⁵Te doloba pai bidi dabego te tobage tibo po wabo te hagela homu mu ebo dao. Tiali digi, te dwai sę ebo bidi dabego da, te tobage dwai hale ebo kolesaga dabe ebo dao.

⁶Te bidigo doloba pai kolesaga ebaso da, teda aga te kolesagago aga bobogela selama, tama aga bugagia bidibo dao. Tiali goli, te dwai sę ebo bidi dabego kolesagago te augwa digi dolobo dao.

⁷Te dwai sę ebo bidi mebago te tibo po weyu, tama augwa te mone hauwa elalubo tiwai yaibao. Tama te mone bidi mebago te tibo po weyu, tama augwali te mone meni yai bidi te tiwai gagawaibao.

⁸Te boi bidi dabego te mone bidi dolainu ebaso da, teda aga monego digi te augwali abelibaso, usu yaibao. Tiali goli, te boi bidi dabego te magi mone me doado bage meni yai bidi dolainu ebaso da, teda te magi walu doado bage meni yai bidigo augwaligo te po homu si me egobeo.

⁹Doloba pai bidi te lam sole ula wiegi yai ebo tiwai ebao. Tiali goli, te dwai sę ebo bidi dabe te lam sole sula sainu ebo tiwai ebo dao.

¹⁰Te hagoma kolesagago te wado po me hwįbo po pedalubo sę ebo dao. Tiali goli, te bidi aga te gasa bidigo agaba te wiegi yai homu momainu ebo bidi da, teda te bidigo homugo koneani kolesaga te wiegi yai elalubao.

¹¹Tama te bidigo sę me isiąma, tama te odolali te mone hauwa sobaso da, teda agai te mone polo tama sia saibao. Tiali goli, te sę ebo bidigo tama te dwasianu dwasianu mone sisini peyu da, teda agai mone te hauwa pedalubo sę eduaibao.

¹²Te bidigo te nai me deli sabo homu elama, tama te odolali tonalubadi te sesabi mu ebaso da, teda aga homu sęgę eyu, bidaibao. Tiali digi, agai te nai sobaso da, teda aga te tiwai homu eyu, te aga bidibo ula te wiegi yai mu da homu elama, tama aga pemene umabo mu yaibao.

¹³Te bidi dabego agabolo te wiegi yai homu kolesaga mawainu ebadi, te aga hagoma ebo bidi yai baso da, teda aga te aga digi dolobao. Tiali digi, te bidigo te agabolo te wiegi yai homu ebo kolesaga mawainu ebaso, te po agai wali pobaso da, teda aga bugagia bidaibao.

¹⁴Te wiegi yai homu koneani kolesaga elalubo bidigo po te bidibo ula mabo wę tiwai yai. Te pogo te bidi tau siyu, te aga dolainu yali nai te ela paibao.

¹⁵Te bidigo homu wiegi yai elalubaso da, teda te bidi dabe aga wei homu yaibao. Tiali goli, te tibo po wabo bidigo te dąų walali po bolama, aga te dwai sunumidu bilibo dao.

¹⁶Te wiegi yai homu elalubo bidi tigidali, augwaligo homu kone bolo palama, tama te sę yaibao. Tiali goli, te wiegi yai homu meni yai bidi dabe, augwaligo te augwa umuna sai kolesaga te pepeli diliba hania hanilibo dao.

¹⁷Te tibo po sela asiyu, te po hasegelebo bidi yai baso da, teda te sęgęgo agaba gegaibao. Tiali goli, te po sela asiyu, te po dolo mu pusubo bidi da, teda agai te we bidi tau siyu, te augwali bugagia bidimainu ebao.

¹⁸Te gasa bidi dabego te bidi aga dodolomainu isiąbo bidi da, aga te dwai mu bidiyu, te aga dwai hale mu yaibao. Tiali goli, te gasa bidi dabego aga dodolomainu ebo bidi yai baso da, teda te we bidigo agaba te genuai nogi momainu ebo dao.

¹⁹Te bidigo agai magi nai me deli sabo homu elama, tama nosali agai te nai sobaso da, teda aga bugai haliga elama, tama pemene mu yaibao. Tiali goli, te wiegi yai homu meni yani bidi dabego da, augwaligo te dwai kolesaga ebo sę te tudiba me mugobeo.

²⁰Te bidi te wiegi yai homu kolesaga elalubo bidi dali bilali da, teda agai me te wiegi yai homu kolesaga saibao. Tiali goli, te bidi te wiegi yai homu meni ebo bidi dabe dali kisasa bilibaso da, teda te sęgęgo aga gegaibao.