Bugagia Bidibo Kolesagade Po Asęai Buku 12:19-28

¹⁹Te ili po wabo po te pęwadage sogo mu elaluama, tama bidi dabego te po homugo gegeda palaibao. Tiali goli, te mu po da, te sesemane sogo mu elaluaibao.

²⁰Te dwai kolesaga yabo homu ebo bidi dabego, augwa digi augwa tibo po ola mabo dao. Tiali goli, te we bidi dabe tau siyu bugagia bidimainu homu ebo bidigo da, teda aga digi te pemene ebo dao.

²¹Te doloba pai bidi dabe augwaliba te dobo sę pedalugobeo. Tiali goli, te dwai sę ebo kolesaga ebo bidi dabe da, augwaligo te dwai sęgę hauwa elalubo dao.

²²Genuai Bidi te haliga sębę mu eyu, tama te tibo po wabo bidi tigidali dali te boi bidi homu ebo dao. Tiali goli, agai te mu po naga wabo bidi dabe dali te agai pemene ebo dao.

²³Te wiegi yai sę yabo kolesaga koneai bidigo, agai te aga wiegi yai homu elalubo te polo tama me pusugobeo. Tiali goli, te wiegi yai homu meni yai bidigo da, agai po te ąį bole tulalubo tiwai umabo yaibao. Tiali goli, te agai po odobo we bidi dabe da, te augwaligo koneama, te aga kolesaga umuna sai bidi tiwai da wabo dao.

²⁴Te sę dene ebo bidi da, te tonalubo bidi pedelaibao. Tiali goli, te hagela bidi dabe te olo sę naga ebo bidi pedelaibao.

²⁵Te bidigo homu gone te sesemane kone tua pabo bidi da, teda aga te haliga sęgę mu elama, tama aga homu dolaibao. Tiali goli, aga abagigo te bidi dali te wiegi yai po obaso da, teda aga te bugai haliga ma ebo dao.

²⁶Te doloba pai bidi dabego te wiegi yai sunumi te augwa abagi dabeba ola mawaibao. Tiali goli, te dwai kolesaga ebo bidi dabego te wiegi yai sunumidu pabo tagalu, tama gegeda pabo dao.

²⁷Te hagela bidigo te hasa enegi peyu da, te augwaligo gegebo me sugobeo. Tiali goli, te sę dene ebo bidi da, augwali te dwagi yai bidi dabe mu dao.

²⁸Te doloba pai kolesaga wali pabo bidi te aga bidabo ula selama, bugagia bidaibao. Te tobage kolesaga da, te gamonabo kolesaga mu dao.