Bugagia Bidibo Kolesagade Po Asęai Buku 11:5-29

⁵Te doloba pai kolesagago te doloba pai bidi dabe augwa tau siyu, tama te doloba pai sunumi wali pabo usu yaibao. Tiali goli, te dwai kolesagago te dwai bidi dabe augwa digi tula mumainu ilibo dao.

⁶Te doloba pai kolesagago te doloba pai bidi dabe augwa tau siyu, tama augwa bugagia bidaibao. Tiali goli, te Godiba homu kęą pisąwai bidi dabe augwa te dwai kolesagade dolaibao.

⁷Te dwai sę ebo bidi dabego te tama homu yai, te augwa doado bage hauwa te augwa bomogo digi sabo da homu yali. Tiali digi, nosali augwali isibo si da, tama augwa te nai dabe me sogobeo.

⁸Te dwai sę ebo me te sęgę meba te doloba pai bidi dabeba pedalubaso da, teda te Genuai Bidigo augwali ma siyu, tama te dwai sę yali sę me te sęgę te dwai sę ebo bidi dabeba muaibao.

⁹Te dwai kolesaga ebo bidi dabego po obaso da, te pogo te gasa we bidi dabe dolaibao. Tiali goli, te doloba pai bidi dabego te wiegi yai homu kolesaga ebogo te augwa digi tau siyu, tama augwa bugagia bidaibao.

¹⁰Te doloba pai bidi dabego bidibo kolesaga te wiegi yai pedalubo sogo, te hanude bidibo we bidi dabego wiegi yai pemene ebo dao. Tiali goli, te bidi me deligo dwai kolesaga sesemane sogo ebaso da, teda te aga isibo sogo, te we bidi dabe augwa wiegi yai pemene mu eyu, hae wabo dao.

¹¹Te doloba pai bidi dabego te augwa taun tomode wiegi yai kolesaga ebaso, te tebogo te taun wiegi yai pedelaibao. Tiali goli, te dwai kolesaga ebo bidi dabe, augwaligo te dwai po haniani weyu, tama tego te taun dolobo dao.

¹²Te bidigo gasa bidi dolama, te po dwai wabo bidi, aga te kolesaga umuna sai bidi tiwai ebao. Tiali goli, te wiegi yai homu elalubo bidigo pedauwali te pania selama, tama te tobage po me wagobeo.

¹³Te subigila po hauwa wabo bidigo te aga abagigo geme dualubo po pusaibao. Tiali digi, te mu po wabo bidigo te aga abagigo geme dualalubo po me hanilama pusugobeo.

¹⁴Te gavman sę tobolu bidi dabego te we bidi dabeba wiegi yai sunumi dodolobo sę usu isiąyu da, teda te bulu tǫ kantri dolaibao. Tiali goli, te wiegi yai homu mabo bidi hauwa elalubaso da, teda te kantri bugagia dolalu bidaibao.

¹⁵Te bidi me deligo negeli sai madi, te aga digi te negeli wei begelabo usu isąbaso, tama nago te nai negeli sali wei ponabo po dąų walaibaso da, teda nosali te nage genuai sęgę elaluaibao. Tiali goli, te nage bugagia bidabo homu eyu da, nago te kolesaga tudiba muyu, gasa bidigo negeli wei ponabo po dąų wagio.

¹⁶Te gasa we bidi tau sabo kolesaga ebo we dabe, augwali te we bidi dabego gedude genuai nogi elalubo dao. Tiali goli, te gasa we bidi dali homu dene isiąbo bidi dabego te mone hauwa siyu te doado bage naga sabo homu ebo dao.

¹⁷Te nago gasa bidi homu dene elama, tama nago aga wiegi yai ilibaso da, teda te kolesagade te naga digi naga wiegi yai ilibao. Tiali goli, nago gasa bidiba dwai dene mabo sę eyu da, te nagaba digi naga te dwai sę ma ilibo tiwai dao.

¹⁸Te doado bage te dwai bidi dabego sali, te augwali tau sabo mu usu me egobeo. Te olo bage nai naga tiwai yaibao. Tiali goli, te doloba pai kolesaga ebo bidi dabego te wiegi yai nai mu saibao.

¹⁹Te doloba pai kolesaga sainu bomo ebo bidi dabe te augwa bidibo ula saibao. Tiali goli, te dwai kolesaga yainu bomo ebo bidi dabe te augwali isaibao.

²⁰Te sesemane sogo dwai homu ebo bidi dabede te Genuai Bidigo tede homu mu godolo isiąwai. Agai te bagede sębę mu ebo dao. Tiali goli, agai te dolo bilibo bidi dabe te wiegi yai homu pemene ebo dao.

²¹Mu tamao, Genuai Bidigo te dwai kolesaga ebo bidi dabeba po tų ilama, tama agai augwaliba dene gesoai mu ilaibao. Tiali goli, te wiegi yai kolesaga ebo bidi dabego hanigo te po tų ebo ugwaba igulaibao.

²²Te we deli te gasa sawi yai mu bidali, tiali goli agai te bilibo wiegi yai kolesaga te konesiąwai baso da, teda aga te kibu gunide te wiegi yai gol ring elalubo tiwai ebao.

²³Te doloba pai we bidi dabego homu wei ebo homu kolesagago te dwagi yai sę pedalumainu ebo dao. Tiali digi, te dwai kolesaga ebo bidi dabe, augwaligo te dwai homu elalubao, tama tibaso Genuai Bidigo augwali dali sębę genuai mu ebo dao.

²⁴Te bidi mebago te augwa mone me doado bage te gasa bidi dabe tau siyu mabode te wiegi yai homu pemene yalio, tiali goli, augwa digi te umabo mone te augwa sęde sali. Tama bidi mebago te gasa bidi dabe tau saibao homu yali, tiali goli augwaligo hagela homu yali. Augwa mone me doado bage gea sali, tiali goli nosali augwa digi augwa te mone te mu sǫą pali.

²⁵Te gasa bidi tau siyu, te doado bage nai mabo bidi da, aga digi da te doado bage hauwa saibao. Te nago gasa bidi dabe tau sali da, te augwaligo nage me tau saibao.

²⁶Te bidigo aga nai te we bidi dabego abelainu ebadi te gea sobaso da, teda augwaligo te po dwai agaba waibao. Tiali digi, te bidigo te we bidigo agai nai abelimainu ebaso da, teda augwaligo agaba te wiegi yai pemene ebo dao.

²⁷Te bidigo wiegi yai kolesaga wali pabo sę bomo ebaso da, teda te we bidigo agaba bugai haliga yaibao. Tiali goli, te bidigo dwai sę ebo kolesaga idubaso da, teda te dwai sęgo aga gegaibao.

²⁸Te bidigo homugo te aga monego naga aga tau siyu bugagia bidibao homu ebaso da, teda aga te mu tuloluaibao. Tiali goli, te doloba pai bidi dabe da, te bugagia mu bidiyu, te gesi ni yabe elalubo tiwai yaibao.

²⁹Te bidigo aga we wai te bugagia tonalusiąwani da, teda aga doado bage te tigidali hagawaibao. Tama tiwai naga te wiegi yai homu kolesaga meni yai bidi dabego, te augwa doado bage tigidali tagalama, tama augwali te wiegi yai homu kolesaga ebo bidi dabego olo sę ebo bidi pedelaibao.