Brabli Gudwan Song 7:1-6

¹Trubala yu brabli purdiwan gel. Yu fut dubala luk brabli purdiwan wen yu werrimon but. Det dubala leig blanga yu im luk brabli shainiwan.

²Det binjipat blanga yu jis laik kap ful garram wain. En yu binji jis laik det sid daga wen yu pailimap, en olaran detlot purdiflawa jidan.

³Blanga yu milk dubala raunwan jis laik det dubala popo.

⁴Yu nek im longwan en im brabli shainiwan, jis laik det smuthwan ston det jidan langa woda. Yu dubala ai im luk jis laik det woda deya langa Heshban, gulijap langa det geit blanga det taun. En yu nos im luk brabli streitwan jis laik det haiwan haus blanga Lebanan, weya dei oldei wotjimbat Dameskas.

⁵Yu jis laik det brabli haibala hil gulum Kamul. Yu heya im brabli shainiwan en blekwan, en im brabli purdiwan, en im gin meigim eni king wandim yu.

⁶Yu luk purdiwan! Yuwai, yu brabli purdiwan. Yu meigim mi gudbinji en ai laigim yu detmatj.