Brabli Gudwan Song 2:3-17

³Main olmen, yu mowa gudwan langa ola najalot men. Yu jidan jis laik frut daga tri weya mowa gudwan brom najalot tri. Ai laigim jidan gulijap langa yu weya yu gin lukaftumbat mi brabliwei. En wen yu kiskisbat mi, im switwan laik det frut daga.

⁴Yubin deigim mi langa yu ronwan kemp, en yubin shoum mi haumatj yu laigim mi.

⁵Dumaji mi wikwan na en mi wandim mowa brabli gudwan taim garram yu, wal yu garra meigim mi strongbala garram gudwan bush daga, en meigim mi gudbinji garram det frut daga.

⁶Yu pudum yu lefthensaid bingga andanith langa main hed, en yu pudum yu raidensaid bingga langa mi, en jidan brabli gulijap langa mi.

⁷Wal ola gel brom Jerusalem, yumob garra pramis mi brabli strongbalawei. Yumob garra pramis nomo blanga kadimat minbala wen minbala laigim gija detmatj.

⁸Luk tharrei! Main olmen jinginat. Im kaminap oba detlot hil, en im ranran kwikbala langa mi.

⁹Main olmen im kaman brabli kwikbala jis laik det yangwan diya. Im deya na jandapjandapbat atsaid langa main kemp. Im lukinatbat det windo blanga mi, en im tok kwaitbalawei langa mi.

¹⁰Kaman na, main olgamen. Ai laigim yu detmatj. Ai wandim yu garra kaman garram mi.

¹¹Det rein im binij na,

¹²en langa det bush kantri detmatj purdiflawa bin gro. Im taim na blanga singim song. Yu gin irrim detlot song blanga detlot bard ebriweya langa ola kantri.

¹³Detlot tri garram daga, im gulijap kukwan na. En detlot purdiflawa blanga detlot kripa smel brabli gudwan. Yu kaman garram mi, main olgamen. Ai wandim yu garra kaman garram mi.

¹⁴Main olgamen, ai wandim luk yu purdiwan feis, en ai wandim irrim yu tok. Bat yu jis laik detlot bard weya oldei haidim miselp langa ston kantri weya ai kaan faindim yu.

¹⁵Main olmen, yu dalim detlot siliwan yangboi nomo blanga lukinat mi. Dei brabli siliwan laik detlot jigiwan wailwan enimul weya oldei breigimbat detlot purdiflawa blanga main.

¹⁶Main olmen, yu main, en mi blanga yu. Oni yu na gin abumbat gudtaim langa main purdiflawa.

¹⁷Ei, gidap na. Im deibreik na dijan. Im gulijap ailibala na. Yu filim det win im blo na. Yu garra ranawei kwikbala oba detlot hil. Yu garra ranran kwikbala jis laik det yangwan diya.