Brabli Gudwan Song 1:1-13

¹Dijan na detlot brabli gudwan song blanga King Salaman. Im mowa gudwan langa ola najalot song.

²Wal yu kiskisbat mi na. Dumaji yu laigim mi detmatj, im mowa switwan langa ebrijing.

³Ebritaim yu kaman langa mi yu smel brabli gudwan. Wen mi irrim yu neim mi jinggabat det brabli gudsmel blanga yu. Ai sabi ol detlot najalot gel oldei wandimbat yu du.

⁴Yu garra deigim mi na, en yunmi garra ranawei. Yu garra jidan main king, en yu garra abum mi langa yu kemp. Yunmi garra jidan hepiwan na, en yunmi garra abumbat gudbala taim mijamet. Dumaji ai sabi ol detlot najalot gel oldei wandimbat yu du.

⁵Ol yumob gel brom Jerusalem, irrim mi na. Mi blekwan, en mi brabli purdiwan. Mi brabli blekwan wulijim detlot tent blanga detlot deset pipul, en mi brabli purdiwan wulijim detlot ketin langa det haus blanga Salaman.

⁶Nomo rabishim main kala. Det san bin barnim mi en meigim mi brabli blekwan, dumaji main braja olabat bin wail langa mi, en deibin meigim mi adwek langa det greip fam, en ai nomo bin abum taim blanga lukaftumbat miselp gudwei.

⁷Wal yu dalim mi na, main olmen. Wujei yu garra deigim detlot ship blanga fidimbat? Wujei yu garra abum spel brom det hotwan san? Ai nomo wandim lukabat yu ebriweya. Ai wandim kaman streit langa yu. Ai nomo wandim gaburrumap main feis garram heinggitjif, dumaji det najalot stakmen mait luk langa mi.

⁸Main purdiwan gel, yu bulurrum det ship trek, en faindim gras blanga detlot gout blanga yu, gulijap langa detlot tent blanga ola stakmen. Deya na yu garra faindim mi.

⁹Yu sabi langa Ijip dei pudum fetha en najalot ting blanga meigim ola hosis blanga det king purdiwan, bat yu na, main olgamen, yu mowa brabli purdiwan.

¹⁰Det heya blanga yu im brabli shainiwan, en det nekben raidaran langa yu nek, dubala meigim yu brabli purdiwan.

¹¹Ai garra meigim blanga yu golwan tjein garram loda purdiwan silbawan sheip langa det tjein.

¹²Aibin jinggabat wen main king bin leidanbat saidwei, det gudsmelwan medisin blanga main bin spredat ebriweya.

¹³Jis laik detlot gudsmelwan purdiflawa jidan langa lilwan beig langa main nek, wal main olmen leidanbat langa main tjes.