Boskopuman 10:6-24

⁶A e tan nanga a man Simon di e wroko meti buba tron leer. A oso fu a man dati de na sekanti.”

⁷Fa a engel di ben taki nanga en gwe, so a kari tu knekti fu en kon, nanga wan fu den srudati di ben mus hori wakti gi en èn di ben e suku fu libi leki fa Gado wani.

⁸Baka di a taigi den san den mus du, a seni den go na Yopa.

⁹A tra dei fu en den man ben doro krosbei fu a foto kba. A ben de twarfu yuru ten, èn Petrus ben kren go tap'sei fu a oso fu go begi.

¹⁰Dan angri bigin kiri en èn a ben wani nyan wan sani. Di den e meki a nyanyan klari, Gado sori en wan sani.

¹¹A si fa heimel opo, dan wan sani leki wan bigi sribikrosi di ben tai na den fo uku, e saka kon na gron.

¹²Ini a krosi yu ben abi ala sortu meti di e waka tapu fo futu, meti di e kroipi, nanga ala sortu fowru di e frei na loktu.

¹³Dan wan sten taigi en taki: “Petrus, opo. Srakti wan sani, dan yu e nyan.”

¹⁴Ma Petrus piki taki: “Nono, Masra, kwet'kweti! Noiti ete mi nyan wan sani san un leki Dyu no mus fu nyan, fu di a no bun ini Yu ai fu un nyan en.”

¹⁵Dan a sten taki a di fu tu tron taki: “Efu Gado taki wan sani bun fu nyan, dan yu no kan taki moro tak' yu no kan nyan en.”

¹⁶Disi psa dri leisi, dan a sani opo go baka na heimel.

¹⁷A srefi pisten di Petrus e broko en ede san a sani wani taki di Gado sori en, den tu man di Kornelius ben seni, ben tnapu na mofodoro. Den ben aksi-aksi te den feni pe Simon e tan,

¹⁸èn now den ben e kari aksi efu Simon, di den e kari Petrus tu, ben e tan drape.

¹⁹A srefi ten dati Petrus ben sidon e broko en ede ete abra san a si. Dan a Yeye taigi en taki: “Luku, dri man e suku yu.

²⁰Opo go na gron, dan yu go nanga den sondro fu draidrai, bika na Mi seni den.”

²¹So Petrus saka go na gron, dan a taigi den man taki: “Mi na a sma di un e suku. San tyari un kon?”

²²Den man taigi Petrus taki: “Kornelius, wan ofisiri fu den Romeini srudati, seni un kon. Na wan man di bun ini Gado ai èn di e anbegi En. Ala den Dyusma sabi en leki wan bun man. Wan santa engel ben taigi en tak' a mus aksi yu fu kon na en oso fu a kan arki san yu abi fu taki.”

²³So Petrus aksi den fu kon inisei èn fu tan sribi drape. A tra dei fu en Petrus nanga wantu bribisma fu Yopa gwe nanga den.

²⁴A dei na en baka den doro ini Sesarea. Drape Kornelius ben e wakti den kba, makandra nanga en famiri nanga den moro bun mati fu en di a ben kari.