Bè-wénia 2:14-21

¹⁴Ó o Piɛre wã́a hĩ́nɔn yòó dĩ̀n lè mí ninzàwa tonkarowà pírú dòn, ò o bía pɔ̃́npɔ̃́n nɔn ɓa zã̀amáa yi: «Minɛ́n *zúifùwa lè minɛ́n na kará ho Zeruzalɛɛmu yi ɓúenɓúen, mi ɲí bìo á ĩ ì bío á a na mia sese: Mi ko à mi zũń bìo kà ɲúhṹ.

¹⁵Ɓa ɓúi wee leéka le ɓa nùpua mu ɲun sú wee khée, ɛ̀ɛ ká ɓùeé. Lé bìo á mu lé le yìnbíi lɛ́ɛ̀rèwa bìo dènú níi á wa wi yi!

¹⁶Bìo ó o ɲi-cúa fɛɛro Zowɛɛle hĩ́a bía lé bṹn lan wee wé hã laà na kà wán.

¹⁷Bìo kà lé bìo le Dónbeenì bía: ‹Hã pɔ̃̀nna vaa véeníi á ĩ ì bɛn ĩ Hácírí à le è fè ɓa nùpua ɓúenɓúen. Mi zà-báawa lè mi zà-hĩ́nni á wé è fɛɛ ĩ ɲi-cúa. Mi yàrón-fĩ̀a á wé è mi mu bìowa ɓúi na ɓa lá yí dà máa mi. Mi nì-kĩ́a á hã kònkórá wé è ɲì yi.

¹⁸Mu bon. Hɔ̃́n pɔ̃̀nna so yi á ĩ ì bɛn ĩ Hácírí á le è fè ɓa báawa lè ɓa hã́awa na lé ĩ ton-sáwá, á ɓa wé è fɛɛ ĩ ɲi-cúa.

¹⁹Mu bìowa ɓúi na sìí yí zũ á ĩ ì lén yòó ho wáayi, á à wé mu yéréké bìowa ho tá wán. Le cãni, lè ho dɔ̃hṹ, lè le minka yiìní á à kɛń.

²⁰Le wii á à dé mí yuumu á ho pĩihṹ á à wé cṹɛncṹɛn lòn cãni. Bṹn bìowa so ɓúenɓúen á à wé è vé ó o Ɲúhṹso wizon-beenì na cùkú wi á à dãnáa.

²¹Hón pã̀ahṹ so yi ká nùpue lée nùpue na tà von o Ɲúhṹso yèni à wón á à fen.›