Bagibagi 2:17-41

¹⁷Yaubada i baha i pa: “Houga sigasigana u hinena apo geka dewahi a dewehi Alugo Woiyawa apo lawa atapuhi a welehi. Natunatumi ololotohi po wiwinehi apo u baha hina bahabaha pikogeya, ami hewahewali ma babada apo u kawaimoina hina luboniyehi.

¹⁸Ee, noka hougana ugolina u tu bagibagi ololotohi po wiwinehi, Alugo Woiyawa apo a welehi po u baha hina bahabaha pikogehi.

¹⁹Apo u manini hau yada a wogeletehi, ma u wekiwekilala hau hipuli a wogeletehi. Tala po mayau ebebalana po bogahu wopotopotona.

²⁰Kabudala apo ina uguwi ma wamahiya ina kaya po ani galenana mei tala, ma muliyei apoma Guyau a iyeta ina geleta, naka iyetana iyeta baneina po namanamalina.

²¹Ma apoma iyawoi nawa Guyau gowanei hina laupali apo hina luyagohana.” ’

²²Pita gasi i baha i pa, ‘U lawa mi Yudeya, geka bahahi ona nonolihi: Yesu Nasaletagei, Yaubada a manini po a wipoya po a wekiwekilala amodewedewei i wogeletehi po ugolinei Yaubada a winagana i limoineya. Tauta geka ta hanapugeya babana u hayata i wawala.

²³Yaubada i nugotuhu lagoneya yaka Yudasa Yesu u nimami i houni, ma taumi o uni babana ombeneneya tu apapoe lawahi ugolihi po hau ani take hi tutuya po i hilage.

²⁴Tamogi Yaubada i witowolo meya hilage ugolina po hilage wiyuwahi i wihalehi, babana hilage ega a kadidili emoemotana ipa ina womomohi.

²⁵Ubeina po Dawita i baha i pa, “Houga magomagouna Guyau u matana a gagaleya. U awala hinebawau e mamae ugolinei apega lawa hina lipilipiliu.

²⁶Geka binei nugonugou i kaoha ma u baha kaoha awa, yaka hawena apo uyogou ina buda ma a nugotuhu lagoneya a towolo meme ugolina.

²⁷Matababana tau apega hau hiyoyowa una nugohelau yaka gasi apega am tu bagibagi una palihaleu po hiniu ina buda.

²⁸Tam luyagohana tahayana u wiatatiyeu, ma tau tam u matam apo a kaoha duma.”

²⁹Gasi Pita i baha i pa, ‘Walewalehiu, dumalugei apo a paliwelemi naka gogata Dawita i hilage po hi guluwi ma kokowagana amalai e mamae ugolita.

³⁰Tauna tu wipiko ma Yaubada a paliwitumagana kadidilina ugolina i hanapugeya. Yaubada a paliwitumagana ipa apo Dawita gogana emosi ina witaniwaga mei Dawita.

³¹Ma Dawita i nugotuhu lagoneya apo Yaubada awai ina dewaya. Yaka Keliso a towolo meme ubeina i baha i pa, “Apeega hau hiyoyowa una nugohaleu ma hiniu apeega ina buda.”

³²Naka binei Yaubada geka Yesuna hilage ugolina i witowoli, ubeina ma tauyai tu baha moina babana matiyei to galeya.

³³Yesu i wohepaya po u awala hinebawana e mamae. Ma a paliwitumagana ubeina Alugo Woiyawa Yesu i weliyai. Yaka i dewa geka amalai o noonolihi po o gagalehi naka Yesu anani’mbenena i lautepaneya ugoliyai.

³⁴Dawita ega ita gae hau yada mei Yesu ma tamogi i pa, “Yaubada u Guyau ugolina i baha nae i pa: U awala hinebawau una duhuduhuna

³⁵a sigana am gawiya una kadidili lagonihi po aem u labena a hounihi.”

³⁶U lawa, mi Isalaela atapumi, ipa ona hanapugena dumaya geka Yesuna hau ani take o tuutulawiteya naka Yaubada i dewaya po Yesu tauna Guyau po tauna Besinana lawana.’

³⁷Hougana lawa geka bahahi hi noonolihi po hi nugotona. Hi baha nae Pita po tu wituwetuwegahi gehouhi ugolihi hi pa, ‘Walewalehiyai, apo awai to dewaya?’

³⁸Pita ugolihi i baha nae i pa, ‘Atapumi ona nugobui ma bapatiso Yesu Keliso gowanei ona waya, po apo Yaubada ami apapoe ina paligigilihi ma ani’mbenena Alugo Woiyawa ona tuhagaya,

³⁹babana Yaubada a paliwitumagana Alugo Woiyawa binei ugolita po natunatuta ugolihi po bala daodaohi tu miyehi ugolihi. Guyau ata Yaubada e igiigimana ataputa ugolita.’

⁴⁰Pita guguya daodaona i welehi Yesu tuwegana ubeina ma i palihunahunahi i pa, ‘Ami apapoe ona palihalehi yaka apega tu apapoe mitehi ona hilage.’

⁴¹Iyawoi Pita a baha hi itumaganeya naka noka iyetana ugolina bapatiso hi waya. Magouhi mei tausana tonuga hi lui tu witumagana gugunihi ugolina.