Bagibagi 13:35-50

³⁵Ugolinei ma i baha meme i pa, “Yaubada a Tu bagibagi waiwoiyawana apega ina palihaleya po ina buda.”

³⁶Geka paliwitumaganana ega Dawita binei babana Dawita a u houga Yaubada a nugotuhu i wootagohi po i hilage. Ma googana kokowagahi u liyaliyana hi guluwi po hinina i buda.

³⁷Ma tamogi Yaubada lawa emosi hotana hau hilage i towolo meya apega ina buda.

³⁸Walewalehiu, geka binei ipa ona hanapugena dumaya naka geka lawana ugolinei apo apapoe ina paligigilihi po binei ma tuwegana to guuguyeya ugolimi.

³⁹Ma ugolinei apo tu witumagana atapuhi ina houna idumaluhi. Mose a lugagayo ega ita huhouna idumaluta ma Yesu ugolinei apo hina houna idumaluta.

⁴⁰Ugolinei ipa ona gagalena imahi po tu bahapiko awai hi bahebaheya, apega ona wialoni. Hi pa,

⁴¹“Ona lautanigana taumi tu’mpalihibahiba, ona wineneyabayababa ma ona hilage. Matababana ami houga bagibagi awai a dewadewaya naka apega ona witumaganeya. Hawena lawa gehouna ina paliwelemi ma apega ona witumaganeya.” ’

⁴²Hougana Paulo ma Banabasi numa dalabuna hi nenehaleya ma lawa hi lupaliyehi ipa dalabu gehouna hina gunawilehi po geka ginoulihi hina dede mehi.

⁴³Omboina u mulina mi Yudeya po ega mi Yudeya naka mi Yudeya hai witumagana hi wiwaya tauhi atapuhi Paulo ma Banabasi hi wotagohi. Ma tu wituwetuwegahi lawahi ugolihi hi baha ma hi winugokadidilihi hi pa, ‘Yaubada a lunogotootogo ona meme tagoya houga daodaona.’

⁴⁴Dalabu gehouna naka lawa atapuhi meyageina u hinena hi nei po Guyau a baha ipa hina nonoli.

⁴⁵Hougana mi Yudeya lawa boluna hi gagaleya po omgenagenalili nugonugohi i wihogoya. Ma Paulo a baha hi tugotugowiwili po hi yampaligudugudu.

⁴⁶Tamogi Paulo ma Banabasi hi bahabaha gawata babana ega hita geno, po hi pa, ‘Lawa ipa Yaubada a baha hina dede tahaeya ugolimi ma a bahana o wihinigigiyeya. O pa ega ami dewadewa awai ipa luyagohana tuwetuwenai ona waya yaka apo to nehalemi po to nae tauhi ega mi Yudeya ugolihi.

⁴⁷Matababana i lugagayo geka pite Guyau i baheya i pa, “Tam a witowolim yayata tauhi ega mi Yudeya ugolihi. Tam ugolimgei apo luyagohana una neiyai tupo wohepali.” ’

⁴⁸Hougana tauhi ega mi Yudeya geka bahana hi noonoli po hi kaoha ma Yaubada a baha hi wiyateyateya. Ma iyawoi Yaubada i inaganihi luyagohana tuwetuwenai ubeina naka hi witumagana.

⁴⁹Ma Guyau a baha i gunanohaya po tupo noka i wihogoya.

⁵⁰Tamogi mi Yudeya, meyageina babadahi po wiwine waigapolahi po gasi waitumaganahi, hi liuyogigeinihi. Yaka lawa hi lihunahi po Paulo ma Banabasi hi wigawiyehi po tupo naka hi nehaleya.