BƐBAATÍBƐ̀ 18:11-24

¹¹Mɛm̀mɛ kɛ̀ Dɑnniibɛɛ bɑ́ɑ́tí Sodɑɑ nɛ̀ Esetɑɔdi kɛ́mbo bɛnìtìbɛ̀ sikɔusìkuɔ̀ (600),

¹²kɛ́kɔtɛ kɛ́bɑ́tɛ́ Kidiyɑ-Yeɑdimmu Sudɑɑ tenkɛ̀, dɛɛ̀ te kɛ̀ bɛ̀ yu dɛ kó dibòrì kɛ tú: Dɑnni kɔbɛ kɑrì, kɛ mɛ ndɛ̀ yu nɛ̀ yíenní, kɛ̀ dɛ̀ bo Kidiyɑ-Yeɑdimmu ɛì ììkɛ̀.

¹³Bɛ̀ dɛ nyìtɛ́ kɛ́kɔtɛ Efɑdɑimmu tempɛ̃ nditɑ̃rì ĩ́nkɛ̀ kɛ́tuɔkɛ Mikɑɑ cĩ́ɛ̃̀tɛ̀.

¹⁴Bɛnìtìbɛ̀ bɛ̀nùmmù bɛ̀ɛ̀ do kɔ̀tɛ kɛ́pɑɑtɛ́ Dɑiisi ɛì, kɛ̀ bɛ̀ɛ nɑ́kɛ́ bɛ tebìí kɛ dɔ̀: Tɛtenkɑɑnìtɛ̀ nɛ̀ sisɑ́m̀pɔ́sì nɛ̀ tɛtɛtɛ̀ tɛ̀ɛ̀ dɑ̀ri timɑ́tì dɛɛ̀ bo diɛ ntɛcĩ́ɛ̃̀tɛ̀ mɑtɛ̀ miɛkɛ. Díì nɛ́ yɛ̃́ di dò nkɛ́dɔɔ̀mɛ̀.

¹⁵Bɛ̀ mɛ nyĩ kɛ́deè, kɛ́tɑ Mikɑɑ cĩ́ɛ̃̀tɛ̀ kɛ́dɔu nDefii wuɔ nkou.

¹⁶Dɛ mɔ̀nnì kɛ̀ Dɑnni botí kɔbɛ sikɔusìkuɔ̀ (600) bɛ̀ɛ̀ do bɑ̀ɑ́tí kɛ̀ bɛ̀ còḿmú dibòrì.

¹⁷Kɛ̀ bɛ̀ɛ ò dɔu nkɛ́deè kɛ́pɛ̃ɛ̃tɛ́ kɛ́dekɛ kudɑ̀nkù kɛ́tɑ kudieku kɛ́túótɛ́ tɛtenkɑɑnìtɛ̀ nɛ̀ sisɑ́m̀pɔ́sì nɛ̀ tɛtɛtɛ̀ tɛ̀ɛ̀ dɑ̀ri timɑ́tì. Dɛ mɔ̀nnì kɛ̀ bɛnìtìbɛ̀ sikɔusìkuɔ̀ (600) bo dibòrì kɛ̀ ikuɔ́ nìùtì bo bɛ borɛ̀.

¹⁸Kɛ̀ ikuɔ́ nìùtìi yɑ̀ bɛ̀ tɑmɛ̀ o cĩ́ɛ̃̀tɛ̀ kɛ tùótɛ́ tɛtenkɑɑnìtɛ̀ nɛ̀ sisɑ́m̀pɔ́sì nɛ̀ tɛtɛtɛ̀ tɛ̀ɛ̀ dɑ̀ri timɑ́tì, kòo bɛ̀ bekɛ kɛ dɔ̀: Di dɔɔri bɑ dɛndɛ?

¹⁹Kɛ̀ bɛ̀ dɔ̀: Cĩ́ɛ̃́kɛ́ kɛ́yĩ́ ɑ nùù cɛ̃́ũ, kɛ́ tí tũnnɛ kɛ́nɑɑ́ nti botí kuɔ́ nìùtì. A bo ntúmɛ̀ Isidɑyɛɛribɛ botí mɑkù kuɔ́ nìùtì, dɛ̀ í tɔ̃ũnɛ̀ ɑ bo ntúmɛ̀ tɛcĩ́ɛ̃̀tɛ̀ tɛ̀mɑ́ɑ̀ kouɑ̀?

²⁰Kɛ̀ diwɛ̀ìi pĩ́ nyikuɔ́ nìùtì, kòo túótɛ́ tɛtenkɑɑnìtɛ̀ nɛ̀ sisɑ́m̀pɔ́sì nɛ̀ tɛtɛtɛ̀ tɛ̀ɛ̀ dɑ̀ri timɑ́tì, kɛ́kɔɔrɛnko ditĩ̀nnì.

²¹Mɛm̀mɛ kɛ̀ bɛ̀ɛ pɛ̃ɛ̃tɛ́ kɛ́sɔɔtɛ́ bɛ cɛ kɛ́nií nyibí nɛ̀ iwũɔ̃ nɛ̀ tinɛntì.

²²Mikɑɑ nɛ̀ o cɛ̃pɛɛtitɔbɛ̀ kɛ̀ bɛ̀ nyóó bɛ̀ yɑ̀ kɛ̀ bɛ̀ dɛ̀tɛ́ kɛ̀ bɛ̀ mbɛ̀ bɛ̀tì.

²³Kɛ̀ Dɑnni botí kɔbɛ keè bɛ̀ pɛ́ikomɛ̀ kɛ́wɛ̃ɛ̃tɛní kɛ́yɑ̀ Mikɑɑ kóò bekɛ kɛ dɔ̀: Dɛ̀ dòmmɛ? Bɑ nkó yɛùdìhurɛ nyɛ?

²⁴Kòo bɛ̀ tɛ̃̀ńnɛ́ kɛ dɔ̀: Di tùótɛ́ n tenkɑɑnìtɛ̀ nɛ̀ sisɑ́m̀pɔ́sì nɛ̀ tɛ̀ɛ̀ dɑ̀ri timɑ́tì kɛ kérínɛ̀ kɛ wɛ̃̀tɛ kɛ m békú dɛ̀ dòmmɑ̀ɑ̀?