Atuwɑ 8:3-35

³Ləmɑɣɑsɛɛ səŋɑ ɩcɑtɛ nɔnɔkeelɑsɩ nɑ tə hɑpɛɛ tɔɔ nɑ ɑ́ kiisiɣi sɩ:

⁴Yəlɑɑ piyɑ mɛɣɛ ləmɑɣɑsɛɛ mɑ́, mɑ wɛnɑ.

⁵Kʋmɛlɛməŋ ɩ́ kpɛləmɩ nyʋɣʋ tɑɑ mɑɣɑsəm. Lɑɣɑtʋ lɑŋlɑɑ nɑ́ɑ́ kpɛləmɩ nyəm.

⁶Ɩ nɩɩ, tɔm sɔsɔɔntʋ kɛ mɑ wɛnɑ sɩ mɑ heeliɣi-mɛ, mɑ kuliɣi mɑ nɔɣɔ sɩ mɑ heeliɣi-mɛɣɛ kʋsiɣisitu.

⁷Pə tɑɣɑ pʋlʋ, tɑmpɑnɑ kɛ mɑ nɔɣɔ yɔɣɔtəɣɩ nɑ ɩsɑɣɑtʋ tɔm wɛ-m kʋsɔɣɔtʋ kɛ́.

⁸Mɑ nɔɣɔ kʋyɔɣɔtʋtʋ tənɑ siɣisɑɑ kɛ́, kɑloolɑɣɑ yɑɑ tɔm kʋkɛkɛɛtʋ fɛɩ pə tɑɑ.

⁹Lɑɣɑtʋnɑɑ nyəmɑ tə tənɑɣɑ teu kɛ təcɛɩcɛɩ, nɑ tə siɣisɑ teu kɛ mpɑ pɑ wɛnɑ nyəm tɔ.

¹⁰Ɩ pɛɛkɩ mɑ kʋsɛɣɛsətʋ nɑ pə́ kəlɩ liɣitee, nɑ ɩ́ pɛɛkɩ nyəm nɑ pə́ tɛɛ wʋlɑ kʋpɑŋ.

¹¹Mpi tɔ, ləmɑɣɑsɛɛ kəlɑ teu kɛ liɣitee pɛɛ. Liɣitee pʋlʋpʋ tɑ tɑlɑ-yɛ.

¹²Ləmɑɣɑsɛɛ mɑ́, lɑɑkɑlɩ lɑpʋ tɑɑ kɛ́ mɑ təcɑɣɑlɛ wɛɛ, mɑ wɛnɑ nyəm nɑ nyʋɣʋ tɑɑ mɑɣɑsəm.

¹³Tɑcɑɑ nyɑmnɑʋ ntɛ́ ɩsɑɣɑtʋ kisuɣu. Kɑlɑmpɑɑnɩ nɑ ɩsəcɑʋ pə kɛ́ ɩsɑɣɑtʋ mpɑɑʋ kɛ́. Nɑ nɔɣɔ ɩsɑɣɑɑ kɛ́ mpi mɑ kisɑɑ tɔɣɔ.

¹⁴Mɑ́ tənnɑ lɑɣɑtʋ tɑsʋɣʋ nɑ təcɑɣɑnɑʋ, mɑɣɑlɛ lɑɣɑtʋ, nɑ mɑ wɛnɑ toŋ.

¹⁵Mɑ toŋ tɑɑ kɛ́ ɑwulɑɑ tɔ́kɩ kɑwulɑɣɑ, nɑ ɑwulumpiyɑ nɑ́ɑ́ tʋɣɩ mpi mpi pə siɣisɑɑ tɔ sɩ yəlɑɑ ɩ́ lɑ.

¹⁶Mɑ toŋ tɑɑ kɛ́ ɑwulɑɑ tɔ́kɩ kɑwulɑɣɑ, nɑ kʋpɑɣɑlɑɑ nɑ tɛtʋ tɑɑ hʋʋlɑɑ tənɑ nɑ́ɑ́ hʋʋkənɑ.

¹⁷Mɑ sɔɔlɑ mpɑ pɑ sɔɔləɣɩ-m tɔɣɔ. Nɑ mɑ pɛɛkəlɑɑ nɑɑkɩ-m.

¹⁸Mɑ kiŋ kɛ ɑpititu nɑ teeli wɛɛ, nɑ wɛnɑʋ kʋleelim nɑ tɑmpɑnɑ təŋʋɣʋ.

¹⁹Mɑ kʋlʋlʋm kəlɑ wʋlɑ kʋpɑŋ kɛ teu. Nɑ mɑ nyəm nɑ́ɑ́ tɛɛ liɣitee.

²⁰Tɑmpɑnɑ təŋʋɣʋ mpɑɑʋ tɑɑ kɛ́ mɑ tɔŋ mpɑɩsi kʋsiɣisɑsɩ hɛkʋ tɑɑ.

²¹Mɑ sɩɩ kʋpɑntʋ kɛ mpɑ pɑ sɔɔlɑ-m tɔɣɔ. Nɑ mɑ́ suuliɣi pɑ kpɑŋcooŋ.

²²Mɑɣɑ Tɑcɑɑ cɑɑlənɑ ŋmɑʋ kɛ ɩ təmlɛ tɑɑ nɑ pə́cɔ́ ɩ́ lɑkɩ ɩ təmɑ kʋpənɛɛ.

²³Hɑtoo tɔ pɑ ŋmɑ-m kɛ́, fɑɩɩ nɑ pə́cɔ́ pɑ́ ŋmɑɑkɩ tɛtʋ.

²⁴Wɑɑtʋ ɩnɩ tɔ teŋku nɔɣɔlʋ ɩ tɑɑ wɛɛ, pə́cɔ́ lʋm sɛɛlʋ nɔɣɔlʋ ɩ fɛɩ.

²⁵Pɑ lʋlɑ-m kɛ́ nɑ pə́cɔ́ pɑ́ lɑ pɔɔŋ nɑ pə́cɔ́ pulɑsɩ wɛɛkɩ.

²⁶Pəyele Tɑcɑɑ tɑɑ tɩɩ lɑtɑ tɛtʋ yɑɑ kɑteŋɑsɩ, yɑɑ ɑntulinyɑ ciɣilisi nsi sɩɩ nɑɑkɩ tɔ sɩ kɑncɑɑlɑɣɑ nyəŋkɑ.

²⁷Mɑ wɛɛ nɑ pə́cɔ́ Tɑcɑɑ sɩɩ ɩsɔtɔnʋɣʋ, nɑ ɩ́ pɩɩ kʋ tənɑɣɑ kɛ kʋnɑ teŋku sɔsɔ pɑ təsulle.

²⁸Nɑ ɩ́ tʋ ɩsɔŋmʋntʋ kɛ ɩsɔtɑɑ nɑ teŋku sɛɛlɑɑ lʋm tʋlɩ nɑ pə́ lɩɩnɑ tomɑ.

²⁹Wɑɑtʋ ɩnəɣɩ Tɑcɑɑ sɩɩ teŋku kɛ tənɑsɩ sɩ lʋm ɩ́ tɑɑ ŋmɑɑ nɑ ɩ́ pɩɩ tɛtʋ kite.

³⁰Mɑ lɑkɑɣɑ ɩ kiŋ kɛ təmlɛ kɛ́, nɑ mɑ́ hɛɛsəɣɩ ɩ lɑŋlɛ kɛ pɑɑ kʋyɑkʋ ŋku. Nɑ mɑ́ liɣiliɣi tɑm nɑ ɩ́ nɑɑkɩ.

³¹Nɑ mɑ́ liɣiliɣi ɩ tɛtʋ tɔɔ nɑ mɑ lɑŋlɛ hɛɛkənɑ yəlɑɑ.

³²Mɑ pəyɑlɑɑ, pənɛntɛ ɩ́ nɩɩnɑ-m. Mpɑ pɑ təŋəɣɩ mɑ mpɑɑʋ tɔ pɑ nɩɩ leleŋ kɛ́.

³³Ɩ nɩɩ sɛɣɛsʋɣʋ ɩ́ tɑɑ lɔ-kʋ. Ɩlɛnɑ ɩ́ pəsɩ ləmɑɣɑsɛɛ nyə́mɑ.

³⁴Yəlɑɑ mpɑ pɑ nɩɩkənɑ-m tɔ pɑ nɩɩ leleŋ kɛ́. Pɑɑ ɩfemle nteɣe pɑ feŋiɣi mɑ təyɑɣɑ nɔnɔɔsɩ nɑ pɑ́ tɑŋəɣɩ kɑ ɑkelenɑɑ.

³⁵Mpi tɔ, ye wei ɩ́ hikɑ-m ɩ hikɑ weesuɣu kɛ́. Tɑcɑɑ kɑ́ hʋlɩ pʋntʋ kɛ suulu.