Atuwɑ 4:4-20

⁴Pɑɑpɑ sɛɣɛsəɣɩ-m kɛ́, nɑ ɩ́ heeliɣi-m sɩ: Tɔ́kɩ mɑ tɔm kɛ teu kɛ nyɑ́ lotu tɑɑ, nɑ ń təŋəɣɩ mɑ kʋsəsɩɩtʋ n kɑ́ hiki weesuɣu.

⁵N kɑ́ wɛɛnɑ ləmɑɣɑsɛɛ nɑ lɑɣɑtʋ. Tɑɑ lɑ ləsɔɔʋ. Pə́cɔ́ tɑɑ lɔ mɑ nɔɣɔ tɑɑ tɔm nɑtəlɩ.

⁶Tɑɑ lɔ ləmɑɣɑsɛɛ, sɔɔlɩ-yɛ, ɑ kɑ́ pɑɑsənɑ-ŋ.

⁷Lʋ nɑ ń nyɩ́ sɩ ləmɑɣɑsɛɛ ntɛ́ pʋlʋ sɔsɔɔm nɑ ń pɛɛkɩ-yɛ nɑ nyɑ́ wɛnɑʋ tənɑ.

⁸Sɑ-yɛ ɑ kɑ́ kʋsɩ nyɑ́ nyʋɣʋ, wɑɣɑlɩ-yɛ, ɑ kɑ́ tʋ-ŋ teeli.

⁹Pɩɩ wɛɛ-ŋ ɩsɩɩ ntenuɣu kʋpɑŋpɑŋkʋ kɛ nyɑ́ nyʋɣʋ tɑɑ.

¹⁰Mɑ pəyɑlʋ nɩɩ mɑ kʋyɔɣɔtʋtʋ nɑ ń mʋ-tɩ. Ɩlɛnɑ nyɑ́ weesuɣu pɩɩsɩ tɑɣɑlɩ.

¹¹Ləmɑɣɑsɛɛ mpɑɑʋ kɛ mɑ hʋlɑ-ŋ, nɑ mɑ́ tiiki-ŋ tɑmpɑnɑ təŋʋɣʋ mpɑɩsi tɑɑ.

¹²Ye n tɔŋ pə kɑɑ pɛkəlɩ-ŋ. Pəyele ye n kpɑkəɣɩ ɑsewɑ pə kɑɑ co-ŋ.

¹³Tɔkɩ sɛɣɛsʋɣʋ, tɑɑ yele-kʋ, nyɔɔnɑ-kʋ, ŋkʋ kʋ tənnɑ nyɑ́ weesuɣu.

¹⁴Tɑɑ sʋʋ ɑsɑɣɑɑ mpɑɑʋ tɑɑ. Pəyele tɑɑ tɔ kʋ tɑɑ.

¹⁵Tɑɑ tɔ kʋ tɑɑ, cɔlɔ-kʋ nɑ ń təŋ kʋfɑlʋɣʋ.

¹⁶Ye ɑsɑɣɑɑ tɑ lɑ ɩsɑɣɑtʋ pɑɑ tooki. Ye pɑ tɑ lɑ nɑ pə co nɔɣɔlʋ pɑ tom yɑɑkɩ kɛ́.

¹⁷Mpi tɔ, ɩsɑɣɑtʋ tɔɣɔnɑɣɑ kɛ pɑ hɑɣɑsəɣɩ pɑ tɩ, nɑ pɑ́ nyɔɔkɩ mʋsʋŋ sʋlʋm.

¹⁸Siɣisilɑɑ mpɑɑʋ nɑ́ wɛ ɩsɩɩ ilim yɑɑkʋɣʋ kite tɛɛ, nɑ pə́ sɔɔsəɣɩ, hɑlənɑ pə sikuɣu tɔ.

¹⁹Amɑ ɑsɑɣɑɑ mpɑɑʋ nɑ́ wɛ səkpɛtʋɣʋ kɛ́, pɑɑ nɑɑkɩ kʋcopum.

²⁰Mɑ pəyɑlʋ, nɩɩ mɑ sɛɣɛsʋɣʋ nɑ ń ke ŋkpɑŋʋɣʋ nɑ mɑ kʋyɔɣɔtʋtʋ.