Atuwɑ 22:3-15

³Nyʋɣʋ tɑɑ mɑɣɑsəm tʋ loosiɣi wɑhɑlɑ kɛ pooluŋ, ɩlɛnɑ ɩ́ ŋmɛlɩ. Amɑ kʋmɛlɛməŋ nɑ́ lɑkɩ ɑwusɑ, ɩlɛnɑ pə́ nɩɩkɩ-wɛ.

⁴Ye yʋlʋ pɑsəɣɩ ɩ tɩ nɑ ɩ́ nyɑŋnɑ Tɑcɑɑ, pə kɑsəyɑɣɑ ntɛ́ wɛnɑʋ nɑ teeli nɑ weesuɣu.

⁵Sɔwɑ nɑ kɑtɔsɩ pə wɛ yʋlʋ ɩsɑɣɑʋ mpɑɑʋ tɑɑ kɛ́. Ye wei ɩ́ sɔɔlɑ ɩ tɩ pə wɛɛ sɩ ɩ́ cɔlɔ-kʋ.

⁶Hʋ́lə́ɣɩ́ pəyɑɣɑ kɛ mpɑɑʋ ŋku kɑɑ təŋ tɔ. Pɑɑ kɑ kɔmɑ nɑ kɑ́ kpɑtəlɩ kɑ kɑɑ yele-kʋ.

⁷Liɣitee tʋ ŋmɑkələɣɩ kʋnyɔntʋnɑɑ kɛ́. Ɩlɛnɑ kəntəlɑɑ nɑ́ɑ́ pəsɩ mpɑ pɑ kəntəɣɩ-wɛ tɔ pɑ yomɑɑ.

⁸Wei ɩ́ tuuwɑ mpi pə tɑ siɣisi tɔ, wɑhɑlɑ kɛ ɩ kʋŋ. Nɑ ɩ pɑ́ɑ́nɑ́ kpɑ́tʋ́ɣʋ́ kɑ́ sɑɑlɩ yem.

⁹Pɩɩ təŋsɩ kʋpɑntʋ lɑtʋ kɛ nɔɔsɩ kʋpɑŋsɩ kɛ́. Mpi tɔ, ɩ hɑɑkɩ kʋnyɔntʋ kɛ ɩ tɔɣɔnɑɣɑ.

¹⁰Tɔɣɔnɩ woŋlu, ɩlɛnɑ yoou tɛ, nɑ hɔm nɑ kʋtʋɣʋ sɩɩ tənɑɣɑ.

¹¹Yʋlʋ ɩ́ sɔɔlɑ wei ɩ lotu tɑɑ wɛ tənɑŋŋ, nɑ ɩ́ yɔɣɔtəɣɩ pɛɛlɛɛ tɔm tɔ, wulɑʋ ntɛ́ pʋntʋ tɑɑpɑlʋ.

¹²Tɑcɑɑ kentiɣi nyəm tɔɔ kɛ́, nɑ ɩ́ liɣitiɣi ɑsɑɣɑɑ kʋyɔɣɔtʋtʋ.

¹³Felentú kʋyɔɣɔtʋtʋ ntɛ́ sɩ: Tɔɣɔlɑɣɑ wɛ ɑwɑlɩ. Kɑ́ tɑɑ kɔɔ nɑ kɑ́ kʋ-m hɑpəlɛ tɔɔ.

¹⁴Alʋ tɛtɛlɑtʋ kʋyɔɣɔtʋtʋ kɛ́ pʋ́ʋ́ɣʋ́ lumɑŋ nyəŋkʋ kɛ́. Tɑcɑɑ lɔwɑ wei tɔ pʋntʋ hotiɣinɑ kʋ tɑɑ.

¹⁵Kpɑŋʋɣʋ nyɔnɑ pəyɑɣɑ tɑɑ. Ɩlɛ sɛɣɛsʋɣʋ tipilɑɣɑ kɑ́ wɑɑsənɑ-kɛ.