Atuwɑ 17:1-19

¹Pə kəlɑ teu sɩ yʋlʋ ɩ́ nyɑsɑ mʋtiyɑ kpɛtɛ nɑ hɛɛsʋɣʋ, nɑ mpi pɑɑ sɑɑkɩ-ŋ təkpɛtɛkpɛtɛ kɛ təyɑɣɑ ŋkɑ kɑ tɑɑ yoou wɛɛ tɔ.

²Təmlɛ tʋ wei ɩ wɛnɑ ləmɑɣɑsəlɛ tɔ, ɩ kpɑkəɣɩ pəyɑɣɑ tɛtɛlɑtʋ lonte kɛ́ nɑ ɩ́ hiki ɩ pɑɑ nyəm kɛ kpɑncoou tɑɑ.

³Kɔkɔ kɛ pɑ wiiliɣinɑ wʋlɑ, nɑ liɣitee nyəɣəlʋɣʋ sɩ, pɑ nɑɑ kʋ teu. Amɑ Tɑcɑɑ mɑɣɑsəɣənɑ yəlɑɑ lotunɑɑ.

⁴Tɔm nti tə fɛɩ teu tɔɣɔ ɩsɑɣɑʋ keŋnɑ ŋkpɑŋŋ. Nɑ pɔpɔtʋ nɑ́ɑ́ nɩɩkɩ tɔm nti tə wɑkələɣɩ yəlɑɑ tɔ.

⁵Wei ɩ woŋiɣi kʋnyɔntʋnɑɑ tɔ pɑ ŋmɑlʋ Ɩsɔ kɛ́ ɩ tʋʋkɩ. Nɑ wei ɩ pɑɑnɑ lɛlʋ wɑhɑlɑ tɔ, pɩɩ hɔ ɩ ŋkpɑŋʋɣʋ.

⁶Sɑɑlənɑɑ kʋsəɣənɑ kʋkpɑtəlɑɑ nyʋɣʋ, nɑ cɛcɛnɑɑ nɑ́ɑ́ kʋsəɣɩ pɑ piyɑ nyəŋ.

⁷Tɔm kʋpɑntʋ ɩɩ mɑkɩ kʋmɛlɛməŋ. Ɩlɛ ɩsənɑɣɑ kɑloolɑɣɑ kɑ́ mɑɣɑ yʋlʋ sɔsɔ?

⁸Lɛlɑɑ nɑ́ hʋʋkɩ sɩ pɑ kʋcɔɔʋ kɑ́ tʋ-wɛɣɛ nyʋleleŋ, nɑ pɑ́ wɑɑ pɑ təmɑ tənɑ tɑɑ.

⁹Wei ɩ lɔɔkɩ ɩsɑɣɑtʋ nti ɩ tɔɣɔntəlɛ lɑpɑ-ɩ tɔ, ɩ pɛɛkəɣɩ sɔɔlʋɣʋ kɛ́. Amɑ wei ɩ tɔɔsəɣɩ-təɣɩ ɩ kʋyɔɣɔtʋtʋ tɑɑ tɔ ɩ fɑkɩ tɑɑpɑlɑɑ.

¹⁰Kɑlənɑʋ wɑɑsəɣɩ yʋlʋ lɑɣɑtʋ kɛ́, nɑ pə́ kəlɩ tipilɑ nɑɑnʋwɑ kɛ kʋmɛlɛŋ tɔɔ.

¹¹Ɩsɑɣɑtʋ lɑpʋ kɛ ɩsɑɣɑʋ pɛɛkəɣɩ. Amɑ tillu ɩsɑɣɑʋ kɛ pɑɑ ponɑ-ɩ.

¹²Pə kəlɑ teu sɩ ń sulinɑ tɔɣɔlɑɣɑ ŋkɑ kɑ piyɑ pə kpɑwɑ tɔ, nɑ mpi n kɑ́ sulinɑ kʋmɛlɛŋ kɛ sɑɑ wei ɩ kʋmɛlɛntʋ kʋlɑɑ tɔ.

¹³Wei ɩ lɛɛtəɣɩ ɩsɑɣɑtʋ kɛ kʋpɑntʋ lonte tɔ, wɑhɑlɑ kɑɑ tɛ ɩ təyɑɣɑ tɑɑ.

¹⁴Yoou cɑɑlʋɣʋ wɛɛ kɛ́ ɩsɩɩ ɑkɔlɑ tʋlʋɣʋ. Kpɑ nyɑ́ tɩ, tɑɑ yele nɑ kʋ kɔɔ.

¹⁵Yʋlʋ wei ɩ hɑɑkɩ tɑmpɑnɑ tʋ kɛ tɑsəkəlɛ, nɑ wei ɩ́lɛ́ ɩ́ hɑ tɑsəkəlɛ tʋ kɛ tɑmpɑnɑ tɔ. Tɑcɑɑ tɑɑ kpɑɑkənɑ pɑ nɑɑlɛɣɛ.

¹⁶Pɑɑ kʋmɛlɛŋ tɔ́kɑ liɣitee sɩ kʋ yɑkɩ ləmɑɣɑsɛɛ pɩɩ wɑɑsəɣɩ-kʋ.

¹⁷Ceu hʋləɣɩ ɩ sɔɔlʋɣʋ kɛ tɑm kɛ́. Lʋlʋɣʋ tʋ təmlɛ ntɛ́ sɩ ɩ́ sənɑ wɑhɑlɑ wɑɑtʋ.

¹⁸Yʋlʋ wei ɩ fɛɩnɑ nyʋɣʋ tɑɑ mɑɣɑsəm tɔ, ɩnɩ ɩ sɑləɣənɑ niŋ nɑ ɩ́ mʋ ɩ tɔɣɔntəlɛ kəmlɛ.

¹⁹Wei ɩ sɔɔlɑ yoou tɔ ɩ sɔɔlɑ ɩsɑɣɑtʋ kɛ́, nɑ wei ɩ́lɛ́ ɩ hɔŋ ɩ tɩ tɔ ɩ́ polo wɑkəlʋɣʋ tɑɑ.