Atre 1:5-14

⁵—Juãw Paxis na pre hte Tĩrtũm mã gôx kãm mẽ hkrã kumrãr o pa. Tã koja Tĩrtũm tokyx mẽ awỳr amnhĩ Karõ rẽ. Kot ixpãnhã amnhĩ kaxyw mẽ ato mẽ amã ma hkêt kaxyw mẽ awỳr kurẽ. Koja hã apkati grêre nhũm mẽ awỳr kurẽ nhũm ixpãnhã mẽ awỳr wrỳ nẽ mẽ amã agjê nẽ mẽ akamã mẽ akôt pa ho pa. Ka mẽ rĩ kormã Jerujarẽ rũm ajapôj nẽ ma mẽ kãm Tĩrtũm kapẽr jarẽnh o ri mẽ hkôt apa. Anẽ.

⁶Tã nhũm mẽ axte akuprõ. Jejus nẽ ỹ hã mẽ ahkre ho mẽ pa xwỳnh maatijaja nhũm mẽ hixêt pê Oriwêhti nhĩmõk ã axte axpẽn wỳr akuprõ. Hãmri nhũm mẽ amnhĩ tã Jejus kukja nẽ kãm: —Kwa Pahihti mẽ inhmã mẽmoj jarẽ. Xà kot kaj tokyx apê Tĩrtũm kot mẽ ixwỳr amẽnh xwỳnh ã amnhĩ jarẽ nẽ Rõm nhõ xwỳnhjê nê mẽ pahpê Ijaew kator nà? Hãmri pa mẽ pamjaja amnhĩ to amnhĩptàr o ri ixpa. Anẽ.

⁷Hãmri nhũm mẽ kãm: —Nà Inhĩpêêxà pix na ã mẽmoj kot anhỹrja kukamã àhpumunh. Tapxipix na kot mẽmoj tanhmã ho hã arĩgro nẽ mẽmoj tanhmã ho hã mytwrỳ pumunh mex. No mẽ kajaja mo kaxyw kot ka mẽ amnhĩ katorta kukamã amnhĩ jarẽnh ma?

⁸Nà kot paj ãm mẽ amã mẽmoj to pyxire nẽ hkukamã harẽ. Koja Tĩrtũm tokyx mẽ awỳr amnhĩ Karõ rẽ nhũm ixpãnhã kot mẽ ato amnhĩptàr kaxyw mẽ akarõ mã agjê. Hãmri ka mẽ ma pyka piitã hkôt anhgrà nẽ ma mẽ kãm ixkapẽr jarẽnh o ri mẽ hkôt apa. Jar Jerujarẽ kamã nẽ pika pê Jutej kôt nẽ nhãm pika pê Samar kamã nẽ pika piitã hkôt mẽ kãm ijarẽnh o ri mẽ hkôt apa. Ã mẽ ate amnhĩ nhĩpêx anhỹr pix kukamã kot paj mẽ amã harẽ. Anẽ.

⁹Nhũm pre ã Jejus mẽ kãm kapẽr anẽ hãmri nẽ mẽ kêp kànhmã àpir o tẽ nẽ mẽ noo mã ma kaxkwa hwỳr àpir o tẽ nẽ kakrãm axà nẽ mẽ kêp akunok.

¹⁰Hãmri nhũm mẽ tee ri hapêr o kuhê rãhã nhũm mẽhõ myja wa axkrut nẽ mẽ hwỳr wrỳ nẽ mẽ kutã wa xa. Wa ê hakaj nẽ wa xa.

¹¹Hãmri nẽ mẽ kãm: —Pa Garirej nhõ xwỳnhjaja? Kwa mo kaxyw na ka mẽ tee ri kaxkwa pumunh o akuhê? Tĩrtũm na akupỹm amnhĩ wỳr Kra Jejus o api ka mẽ àpir kãm omu. E mẽ tee ri hkukamã ajamaxpẽr kêt nẽ. Koja nhỹrmã man akupỹn mẽ awỳr wrỳ. Te mẽ arũm kaxkwa hwỳr àpirja pyrà nẽ akupỹn mẽ awỳr wrỳ ka mẽ omu. Anẽ.

¹²Tã nhũm Jejus nhỹ hã mẽ ahkre ho mẽ pa xwỳnh maatijaja wa kuma nẽ awjanã nẽ ma akupỹm krĩm mra. Hixêt pê Oriwêhti rũm ma akupỹm Jerujarẽ hwỳr mra. Wỳr jawỳ nhũm mẽ akupỹm hpôx tokyx anẽ.

¹³Hãmri nẽ akupỹm kỳx pê ixkreja wỳr api nẽ agjê. Na pre Simãw Pêtre nẽ Juãw nẽ Xiakre nẽ Andrehti nẽ Firipti nẽ Tomas nẽ Patoromew nẽ Matêwre nẽ Xiakre hõ pê Apew kraja nẽ Simãw Jerox nẽ Jut pê Xiakre hkraja. Mẽ piitã Jejus nhỹ hã mẽ ahkre ho mẽ pa xwỳnh maatijaja na pre mẽ.

¹⁴Nẽ mããnẽn mẽ hkôt mẽ hkwỳjaja. Jejus katorxà Marir nẽ Jejus tõjaja nẽ Jejus kot tanhmã mẽni ho mex to xwỳnh kwỳjaja nhũm prem kỳx pê ixkreja wỳr Jejus nhỹ hã mẽ ahkre ho mẽ pa xwỳnh maatijê hkôt gjêx pa. Hãmri nẽ xatã axpẽn wỳr akuprõ nẽ Tĩrtũm mã amnhĩ jarẽnh o hkrĩ.